ԵՐԵՎԱՆ, 29 դեկտեմբերի. /Նովոստի–Արմենիա/. Արմավիրի մարզպետարանն ինքնուրույն կմարի օդափոխիչների շահագործման պատճառով առաջացած էլեկտրաէներգիայի պարտքերը, երեքշաբթի ՀՀ կառավարության արտահերթ նիստի ժամանակ հայտարարել է ՀՀ տարածքային կառավարման և արտակարգ իրավիճակների նախարար Արմեն Երիցյանը, հաղորդում է
«ԱՌԿԱ» գործակալությունը։
Կառավարությունը դեկտեմբերի 24–ին նիստի ժամանակ ընդունել էր Արմավիրի մարզպետարանի առաջարկը, որը վերաբերում էր 8,4 մլն դրամի (17,4 հազար դոլար) հատկացմանը սպառած էլեկտրաէներգիայի պարտքերը մարելու համար, որոնք առաջացել էին ամռանը օդափոխիչների շահագործման պատճառով։
Առաջարկն առաջացրել էր վարչապետի դժգոհությունը, ով պահանջել էր մինչև միջոցների հատկացումը հստակեցնել պահանջների հիմնավորումներն ու ներկայացնել ստուգման արդյունքները կառավարության հաջորդ նիստի ժամանակ։
Երեքշաբթի նիստի ժամանակ կառավարությունը չեղյալ հայտարարեց գումարի հատկացման մասին բոլոր նախորդ որոշումներն այն պատճառով, որ մարզպետարանը չէր ներկայացրել բավարար հիմնավորումներ պետության հաշվին ծախսերը մարելու համար։
Փաստորեն, ինչպես նշեց վարչապետ Հովիկ Աբրահամյանը, սա հենց այն որոշումն է, որն առաջացրել էր կառավարության մտահոգությունն ու այսօր չեղյալ էր ճանաչվել, ինչի հիման վրա կառավարությունը մերժել էր միջոցներ տրամադրել Արմավիրի մարզին։–0–
