ԵՐԵՎԱՆ, 24 նոյեմբերի. /Նովոստի–Արմենիա/. Հոկտեմբերի 30–ին Արմավիրի «Մանուշակ» մանկապարտեզում պատանդառված 3 տարեկան Հմայակի մոտ հոգեբանական խնդիրներ են առաջացել:
Ինչպես հաղորդում է armtimes.com–ը, ծնողները երեխային այլևս մանկապարտեզ չեն տանում, այժմ փոքրիկի հետ հոգեբաններ են աշխատում:
Հիշեցնենք, որ այս տարվա հոկտեմբերի 30-ին մանկապարտեզ էր ներխուժել 36-ամյա Արգամ Հովիկյանը, դանակի սպառնալիքով իր մոտ պահել 3 տարեկան Հմայակի: Հովիկյանն ուզում էր հանդիպել մանկապարտեզում աշխատող իր նախկին կնոջ հետ, ում տատը նույն մանկապարտեզի տնօրենն է:
Ոստիկանության հատուկ գործողության արդյունքում երեխան չորս ժամ անց անվնաս դուրս էր բերվել մանկապարտեզից: Արգամ Հովիկյանը մարմնական վնասվածքներ էր հասցրել իրեն, նախկին կնոջը և նրա տատին:
Փոքրիկ Հմայակի մայրը՝ Լիլիթ Հովհաննիսյանը, նշել է, որ միջադեպից հետո տղան անհանգիստ է:
«Այդ դեպքն իր վրա մեծ ազդեցություն է թողել: Գիշերները նորմալ չի քնում, հաճախակի վեր է թռչում: Հաճախամիզություն է սկսվել իր մոտ, նյարդերի հետ կապված մի քիչ ոնց որ լարվածություն կա»,- նշել է մայրը։
Նրա խոսքով, որդու հետ աշխատում են Արմավիրի «Արևածագ» վերականգնողական կենտրոնի հոգեբանները:
Ամուսնուն նույնպես մասնագետներն իրենց ուշադրության կենտրոնում են պահում և փորձում են հոգեբանական աջակցություն ցուցաբերել, որովհետև փոքրիկի հայրը դեպքի օրը գտնվելով դրսում, նյարդային գերլարված ժամեր է անցկացրել: Այդ լարվածության հետևանքով նա նաև ձեռքն էր վնասել` հարվածելով պատին:
Ծնողները փոքրիկին մանկապարտեզ չեն տանում հոգեբանների առաջարկով:
Ինչ վերաբերում է երեխայի ու նրանց հանդիպումների արդյունքում նկատվող առաջընթացին, մայրը նշում է, երեխային տանում, բերում են, այդ օրը մի քիչ ավելի հանդարտված է լինում, բայց հետո կարծես նորից մտնում է այդ ամեն ինչի մեջ։
Փոքրիկը երբեմն փորձում է պատմել իր հետ կատարվածը:
«Որոշ դրվագներ պատմում է, ասում է «ձյաձյան» դանակը իր կոկորդին է պահել, բայց մենք չենք թողնում ինքը խոսի», – նշել է 3–ամյա փոքրիկի մայրն ու հավելել, որ մասնագետները հույս ունեն, որ փոքր տարիքի պատճառով երեխան հոգեբանական խնդիրները համեմատաբար արագ կհաղթահարի:–0–