ԱՆ–ն հրապարակել է դեղատոմսով բաց թողնվող դեղորայքի ամբողջական ցանկը
ԵՐԵՎԱՆ, 22 փետրվարի./Նովոստի–Արմենիա/. ՀՀ առողջապահության նախարարությունը հրապարակել է դեղատոմսով բաց թողնվող դեղորայքի ամբողջական ցանկը։
2018 թվականի մարտի 1-ից ՀՀ գրանցված հակավարակային (այդ թվում հակաբիոտիկներ), հսկվող և հորմոն պարունակող դեղերը ձեռք բերելու համար անհրաժեշտ է բժշկական կազմակերպության կողմից տրված դեղատոմսի առկայություն` ըստ սահմանված կարգի:
Գերատեսչությունից տեղեկացնում են, որ սահմանվել է դեղատոմսի 4 նոր ձևաթուղթ՝ թմրամիջոցների, հոգեմետ նյութերի, մեկանգամյա կամ բազմակի անգամ տրամադրվող դեղերի համար: Որևէ այլ թղթի վրա գրված դեղատոմսով դեղի դուրսգրումն արգելվում է։ Ինչ վերաբերում է դեղատոմսի ժամկետներին, ապա թմրանյութեր ու հոգեմետ նյութեր պարունակող դեղերի դեղատոմսերն ուժի մեջ են 10 օր, իսկ մնացած դեղերն ու բազմակի դեղատոմսերը` 6 ամիս:
«Միաժամանակ, մինչև 2018 թվականի դեկտեմբերի 31-ն ուժի մեջ են նախկին կարգով հաստատված դեղատոմսերի ձևերը», – նշվում է հաղորդագրության մեջ։
Այսպիսով, Առողջապահության նախարարությունը ներկայացրել է ՀՀ–ում գրանցված հակավարակային դեղերի ցանկը, ՀՀ–ում գրանցված հոգեմետ նյութ պարունակող դեղերի ցանկը, ՀՀ–ում գրանցված հորմոնային դեղերի ցանկը և առանց դեղատոմսի բաց թողնվող դեղերի ցանկը։
Բոլոր ցանկերին կարելի է ծանոթանալ հետևյալ հղումով։–0–
