Գագիկ Սուրենյանն ուրախացրել է Հայաստանի բնակիչներին առաջիկա 5 օրերի եղանակային կանխատեսմամբ

ԵՐԵՎԱՆ, 29 նոյեմբերի. /Նովոստի Արմենիա/. Առաջիկա հինգ օրերին Հայաստանում սպասվում է պարզ և տաք եղանակ, այսօր լրագրողների հետ հանդիպմանն ասաց ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյան։

«Այսօր և վաղը մինչև կեսօր Հայաստանը կգտնվի Միջերկրական ծովից ներթափանցած ցիկլոնի ազդեցության ներքո։ Ներկա պահին ՀՀ շրջանների մեծ մասում առկա են տեղումներ, Շիրակում, Արագածոտում, Կոտայքի լեռնային շրջաններում տեղումները հիմնականում ձյան տեսքով են: Կեսօրից հետո թույլ տեղումներ են սպասվում հանրապետության նաև մյուս շրջաններում», – ասաց Սուրենյանը։

Նրա խոսքով, հինգշաբթի կեսօրից հետո ցիկլոնը դուրս կգա հանրապետության տարածքից և տեղումները կդադարեն: Դեկտեմբերի 1-5-ը հանրապետության ողջ տարածքում սպասվում է առանց տեղումների եղանակ:

Գագիկ Սուրենյանը նշեց, որ առաջիկա 5 օրերին ջերմաստիճանի առանձնապես տատանումներ չեն կանխատեսվում։

«Միայն դեկտեմբերի 1-ի գիշերը եղանակի պարզեցման հետևանքով ջերմաստիճանը կնվազի։ Երևանում և Արարատյան դաշտում գիշերային ժամերին ջերմաստիճանը կնվազի մինչև –2...- 4 աստիճան, իսկ ցերեկը սպասվում է +7...+9 աստիճան », – ասաց Սուրենյանը։ –0–