«Ռոման» կփորձի պայմանագիր ստորագրել Մխիթարյանի հետ տրանսֆերային պատուհանի վերջին օրը

ԵՐԵՎԱՆ, 2 սեպտեմբերի./Նովոստի–Արմենիա/. «Ռոմա» իտալական ակումբը կփորձի պայմանագիր ստորագրել «Արսենալ» լոնդոնյան ակումբի կիսապաշտպան Հենրիխ Մխիթարյանի հետ տրանսֆերային պատուհանի վերջին օրը, նշվում է «Արսենալի» բլոգում` հղում անելով Sky Italy սպորտային ռեսուրսին։

«Ոչ մեկի համար գաղտնիք չէ, որ «Արսենալն» այս ամառ փորձել է վաճառել հայ կիսապաշտպանին, սակայն Ալեքս Իվոբիի հեռացումից հետո թվում էր, թե նա կմնա «Արսենալում» առնվազն 6 ամիս», – նշվում է հաղորդագրության մեջ։

Նշվում է, որ «Ռոման» կարող է վարձակալել Մխիթարյանին մեկ սեզոնով` հետագայում գնելու իրավունքով։ Նաև նշվում է, որ հայ կիսապաշտպանը վաստակում է շաբաթական մոտ 220 000 ֆունտ ստեռլինգ, այդ պատճառով նրա հեռանալը թույլ կտա թեթևացնել ակումբի աշխատավարձային բեռը։ 

Ավելի վաղ ԶԼՄ–ները տեղեկացրել էին, որ «Արսենալը» ցանկանում է վաճառել Մխիթարյանին` «Քրիսթալ Փելեսում» հանդես եկող Վիլֆրիդ Զաային ձեռք բերելու համար, որը գնահատվում է 55 մլն ֆունտ ստեռլինգ, սակայն «Քրիսթալ Փելեսը» Զաայի համար պահանջել է 80 միլիոն։ Այս խոսակցությունները դադարեցին ֆրանսիական «Լիլ»–ից Նիկոլյա Պեպեին 79 մլն ֆունտ ստեռլինգով գնելուց հետո։

Այս տրանսֆերային պատուհանի շրջանակում, որն Իտալիայում փակվում է այսօր ժամը 21։00–ին, «Ռոման» «Յուվենտուսից» 29,5 մլն եվրոյով ձեռք է բերել Լեոնարդո Սպինացոլային, «Ռեալ Բետիսից»` Պաու Լոպեսին (23,5 մլն եվրո), «Ատալանտայից»`Բրայան Քրիսթենսենին (21 մլն եվրո) և «Նապոլից»` Ամադ Դիարային (21 մլն եվրո)։

Նշենք, որ Հենրիխ Մխիթարյանի և «Արսենալ» ակումբի միջև կնքված պայմանագրի վերջնաժամկետը 2021 թվականն է։։–0–