Հենրիխ Մխիթարյանն ավարտում է իր կարիերան Հայաստանի ազգային հավաքականում (ՖՈՏՈ)

ԵՐԵՎԱՆ, 3 մարտի./Նովոստի–Արմենիա/. Հայաստանի ֆուտբոլի հավաքականի ավագ, «Ռոմայի» կիսապաշտպան Հենրիխ Մխիթարյանը հայտարարել է ազգային ընտրանու կազմում իր մրցելույթներն ավարտելու մասին։

«Հիշում եմ, երբ առաջին անգամ հագա ազգային հավաքականի մարզաշապիկը, դա Պանամայի դեմ ընկերական խաղում էր և երբ իմ երկրի համար խփեցի առաջին գոլս աշխարհի առաջնության որակավորման փուլի Էստոնիայի դեմ խաղում։ Անկախ դժվարությունից՝ ուզում էի հաղթել կարիերայիս ամեն քայլափոխին»,- գրել է մարզիկը իր Instagram-յան էջում։

Մխիթարյանը մեծ պատիվ է համարել իր երկրի ազգային հավաքականում վերջին 15 տարիներին հանդես գալը, և ավելի մեծ պատիվ է համարել վերջին 6 տարիներին թիմի ավագ լինելը։

«95 միջազգային խաղերից, քրտնաջան աշխատանքից, նվիրումից և իմ ճանապարհի ընթացքում աննախադեպ վերելքներից և վայրէջքներից հետո որոշում եմ կայացրել ավարտել Հայաստանի ազգային հավաքականի կազմում մրցելույթներս: Այս եզրահանգմանն եմ եկել 2021 թ.-ի նոյեմբերին Գերմանիայի դեմ կայացած խաղից հետո»,- գրել է ֆուտբոլիստը:

Նրա կարծիքով՝ հիմա ճիշտ ժամանակն է:

«Իմ հավաքականին տվել եմ այն ամենը, ինչ կարող էի: Հետևաբար առաջիկա տարիներին ամբողջությամբ կենտրոնացած կլինեմ ակումբային մրցելույթներիս վրա: Իմ ֆուտբոլային բույնը հյուսվել է Հայաստանում՝ իմ հայրենիքում, և ես հավերժ երախտապարտ կլինեմ բոլոր նրանց, ովքեր աջակցել են ինձ, ովքեր մարզել ու կրթել են ինձ, ում հետ ես խաղացել եմ և վերջապես յուրաքանչյուրին, ով նպաստել է իմ՝ որպես ֆուտբոլիստ և որպես մարդ, կայացմանը։ Հաջողություններ իմ ազգային հավաքականին, ընդմիշտ ձեր` Հենո»,- գրել է Մխիթարյանը:–0–

View this post on Instagram

A post shared by Henrikh Mkhitaryan (@micki_taryan)