ԵՐԵՎԱՆ, 28 փետրվարի. /Նովոստի–Արմենիա/. Օսկարի գիշերը Լոս Անջելեսում անցկացվող ամենաշքեղ և կարևոր միջոցառումներից մեկը լեգենդար Էլթոն Ջոնի գլխավորությամբ անցկացվող դրամահավաք–ճաշկերույթն է, որի ընթացքում կատարված բոլոր հանգանականություններն ուղղվում են մարդասիրական ծրագրերի իրագործմանը։
Մինչ օրս նման դրամահավաք–ճաշկերույթների ընթացքում հնարավոր է եղել հանգանակել շուրջ 56 մլն դոլար։
Այս տարվա առանձնահատկություններից մեկն այն է, որ Էլթոն Ջոնի հիմնադրամը նշել է իր գործունեության 25–ամյակը և որ ամենակարևորն է այս դրամահավաք–ճաշկերույթի ընթացքում հարյուրավոր հոլիվուդյան աստղերի ներկայությամբ ցուցադրվել է Հայոց ցեղասպանության մասին պատմող «Խոստում» («The Promise») ֆիլմը։
Ձեռնարկի իրականացմանը մեծապես աջակցել են հայ բարերարներ Վաչե և Րաֆֆի Մանուկյանները։
Լեգենդար Էլթոն Ջոնը այս դրամահավաք–ճաշկերույթի շրջանակում բացառիկ հարցազրույց է տվել USArmenia–ին` նշելով, որ չափազանց կարևոր է, որպեսզի Հայոց ցեղասպանությունը ճանաչեն ու դատապարտեն բոլորը։
Загружается новость ... "Лево"
«Մանուկյանների ընտանիքի և պրոդյուսեր Էրիկ Իսրայելյանի հետ ընկերության արդյունքում ես և հիմնադրամի նախագահը Դևիդն ավելի շատ ենք տեղեկացել Հայոց ցեղասպանության մասին։ Այս ֆիլմը ցույց է տալիս, թե ինչպես կարելի է հիշել անցյալի վայրագությունները և սովորել սխալների վրա», – նշել է Էլթոն Ջոնն ու ավելացրել, որ ցանկանում է, որ բոլորն իմանան, թե ինչ պատահեց հայերի հետ Ցեղասպանության տարիներին։
«Ոչ ոք մոռացված չէ», – ընդգծել է Էլթոն Ջոնը։
Դրամահավաք–ճաշկերույթին է մասնակցել նաև հոլիվուդյան աստղ Շերոն Սթոունը։
«Ամերիկյան հասարակության զգալի հատվածը տառապում է այս կամ այն առողջական խնդիրներով, նրանք մեր օգնության կարիքն ունեն։ Պետք է ընդունել դա և լինել կարեկից։ Մենք այսօր այստեղ ենք ասելու, որ անտարբեր չենք դիմացինի հանդեպ», – նշել է Սթոունը։
Загружается новость ...
"Право"
Դրամահավաք–ճաշկերույթի հյուրերի ներկայությամբ, որոնց թվում էին հոլիվուդյան աստղեր, ամերիկյան հասարակության դեմքեր, քաղաքական գործիչներ, ցուցադրվել է Հայոց ցեղասպանության մասին պատմող «Խոստում» ֆիլմը։
Այս նախաձեռնությունից հանգանակված գումարը կուղղվի տարբեր բարեգործական նպատակների իրականացմանը։
Ամենահեղինակավոր «Օսկար» կինոմրցանակին հավակնող «Խոստում» դրամայի պրեմիերան տեղի է ունեցել նախորդ տարվա սեպտեմբերի 11-ին Տորոնտոյի 41-րդ կինոփառատոնի շրջանակում:
Ֆիլմը ներկայացնում է Հայոց ցեղասպանության տարիներին տեղի ունեցած սիրո պատմություն:
Ֆիլմի ռեժիսորն է Թերի Ջորջը: Ֆիլմի սցենարի հեղինակն է Ռոբին Սվայկորդը:
Ֆիլմի գլխավոր դերակատարներն են աշխարհահռչակ դերասաններ Քրիստիան Բեյլը, Օսկար Այզեքը և Շառլոտա Լը Բոնը: Ֆիլմում նկարահանվել են նաև ֆրանսիացի աստղ Ժան Ռենոն, ինչպես նաև Ջեյմս Քրոմվելը և Անժելա Սարաֆյանը:
Ֆիլմը նկարահանվել է ամերիկահայ միլիարդատեր Քըրք Քրքորյանի ֆինանսական աջակցությամբ, ով հեռացել է կյանքից 2015 թ.–ին։
Ֆիլմի գլխավոր հերոսներն են ուսանող-բժիշկ Միքայել Պողոսյանը (Օսկար Այզեքը), ֆոտոլրագրող Քրիս Մայերը (Քրիստիան Բեյլ), ով ժամանել է Օսմանյան կայսրություն՝ լուսաբանելու աշխարհաքաղաքական իրադարձությունները և Փարիզում սովորող հայ նկարչուհի Աննան (Շառլոտա Լը Բոն): Բովանդակությունը կառուցված է նրանց սիրային եռանկյան շուրջ Օսմանյան կայսրությունում Հայոց ցեղասպանության տարիներին: -0-
