«Իմ քայլի» ևս երկու պատգամավոր պատրաստ են վայր դնել իրենց մանդատը, եթե ընդդիմությունը նույն կերպ վարվի․ Մակունց

ԵՐԵՎԱՆ, 11 մայիսի․/Նովոստի-Արմենիա/․ «Իմ քայլը» խմբակցության ղեկավար Լիլիթ Մակունցը հայտնել է, որ Սասուն Միքայելյանից բացի ևս 2 պատգամավոր պատրաստ են վայր դնլ իրենց մանդատները, եթե «Լուսավոր Հայաստան» ընդդիմադիր կուսակցության իրենց գործընկերները նույն կերպ վարվեն։

Ավելի վաղ Միքայելյանը հայտնել էր, որ ինքը խորհրդարանում տեղի ունեցած ծեծկռտուքից հետո պատրաստ է վայր դնել մանդատը, եթե «Լուսավոր Հայաստան» խմբակցության ղեկավար, ծեծկռտուքի մյուս մասնակից Էդմոն Մարուքյանը գնա նույն քայլին։

«Իրենց մանդատները պատրաստ են վայր դնել նաև «Իմ քայլը» խմբակցության պատգամավորներ Արտակ Մանուկյանը և Վահե Ղալումյանը, պայմանով, որ միաժամանակ իրենց մանդատները վայր են դնում նաև «Լուսավոր Հայաստան» խմբակցության պադգամավորներ Հրանտ Այվազյանը և Սարգիս Ալեքսանյանը։ Սա է մեր դիրքորոշումը։ Սա է արդարությունը։ Եվ սա է քաղաքական հետևանքը, որ պետք է տեղի ունենա, եթե այն մարդիկ, ովքեր հայտարարում են և խոսում են արժեքներից, իսկապես այդ արժեքների կրողն են»,- ասաց Մակունցը։

Նա նշել է, որ «Լուսավոր Հայաստանը» պետք է հանդես գա արձագանքով և պատասխանի շատ կարճ ժամանակում։

Հիշեցնենք, որ օրեր առաջ ԱԺ-ում «Լուսավոր Հայաստան» խմբակցության ղեկավար Էդմոն Մարուքյանի ելույթի ժամանակ թեժ քննարկում էր ընթանում, որը վերածվել է ծեծկռտուքի` Սասուն Միքայելյանի մասնակցությամբ:-0-