ԵՐԵՎԱՆ, 1 հուլիսի./Նովոստի–Արմենիա/. Հայ սակրավորները Սիրիայում անցկացվող մարդասիրական առաքելության շրջանակում 5 ամիսների ընթացքում ականազերծել են գրեթե 35 հազար քմ տարածք, երկուշաբթի մամուլի ասուլիսում ասաց Հումանիտար ականազերծման և փորձագիտական կենտրոնի տնօրեն Ռուբեն Առաքելյանը:
Հայաստանի պաշտպանության նախարարությունը փետրվարի 8–ին հայտնել է 83 հայ մասնագետներից բաղկացած խմբի` Սիրիայի Հանրապետություն ուղարկելու մասին։ Հայ մասնագետները Հալեպի` բացառապես ռազմական գործողություններից զերծ բնակավայրերում ծավալելու են հումանիտար ականազերծման, բնակչության հակաականային իրազեկման, բժշկական ծառայությունների մատուցման մարդասիրական գործունեություն։
«Հայ փորձագետներն աշխատանքներ են կատարել Սիրիայի հատկապես վտանգավոր շրջաններում, որտեղ անհրաժեշտ էր անհապաղ ապահովել տեղի բնակչության անվտանգությունը»,– նշեց Առաքելյանը։
Загружается новость ...
"Право"
Նրա խոսքով, մարդասիրական առաքելության առաջին խումբն ականազերծել է շուրջ 34 690 քմ տարածք և հայտնաբերել է 29 միավոր ական և պայթուցիկ նյութերի դրվագներ, որոնք ոչնչացվել են սիրիական իշխանությունների կողմից։
Առաքելյանը նշեց, որ հայ փորձագետներն աշխատանքներ են տանում տեղի բնակչության հետ վտանգավոր գոտիներում զգոնության գոտիներում` պայթուցիկ նյութեր հայտնաբերելու նպատակով։
Նա նաև բարձր գնահատեց Հայաստանից մեկնած բժիշկների քրտնաջան աշխատանքը Սիրիայի ոչ միայն հայկական համայնքի, այլ նաև ամբողջ տեղի բնակչությանն օգնություն ցուցաբերելու ուղղությամբ։
«Բժշկական օգնություն է տրամադրվել բոլոր նրանց, ովքեր դրա կարիքն ունեին, հիմնականում` երեխաներին։ Կատարվել է շուրջ 1000 թերապևտիկ միջամտություն, 400` վիրաբուժական, 1300 լաբորատոր–ախտորոշիչ քննություններ»,– ասաց նա։
Կենտրոնի տնօրենն առաջին խմբի աշխատանքը գնահատեց բավարար, նշելով, որ հայկական առաքելության անդամներն առաջին օրվանից ստիպված են եղել հարմարվել նոր էքստրեմալ պայմանների։
Երկրորդ խումբը Սիրիա է մեկնել հունիսի 4–ին և կմնա այնտեղ 4 ամիս։ -0-
