ԵՐԵՎԱՆ, 24 նոյեմբերի. /Նովոստի-Արմենիա/. Հայ-սիրիական բարեկամությունը, այս երկրում հայկական ծաղկուն համայնքի ներկայությունը քրիստոնյա և մահմեդական քաղաքակրթությունների երկխոսության ու փոխադարձ հարստացման լավագույն դրսեւորումներից են, ասաց Հայաստանի Ազգային Ժողովի խոսնակ Հովիկ Աբրահամյանը Դամասկոսում հայկական համայնքի ներկայացուցիչների հետ հանդիպման ընթացքում։
Աբրահամյանի խոսքերով, հայ-սիրիական հարաբերություններն ապացուցում են, որ երկու ժողովուրդներն իրենց շփումներում առաջին հերթին գնահատել են հոգևոր ու մարդկային արժեքները և վայելել փոխադարձ հարգանքը:
Խոսնակը հիշեցրեց, որ Սիրիայում հայերի ներկայությունը հազարամյակների պատմություն ունի: «Սիրիայի ժողովրդի եղբայրական վերաբերմունքի շնորհիվ դուք կարողացել եք պահպանել հարուստ ազգային կյանքն ու մշակույթը, և այսօր սիրիահայությունը հայկական ամենաավանդական համայնքներից մեկն է»,- ՀՀ ԱԺ ղեկավարի խոսքերը մեջբերեցին խորհրդարանի մամուլի ծառայությունից։
Խոսելով հայկական պետության նպատակների մասին՝ Աբրահամյանը նշեց, որ ներկայումս կարևորագույն խնդիրը Հայաստանի պետականության ամրապնդումն ու ուժեղացումն է։
«Հայաստանը միշտ բոլոր խնդիրների և հակամարտությունների քաղաքակիրթ լուծման տրամաբանությունով է առաջնորդվում, և դա երկխոսության ուղին է»,- ընդգծեց նա։
Հայաստանի ԱԺ պատվիրակությունը ծաղիկներ դրեց Հայոց Ցեղասպանության ղոհերի հուշակոթողին` հարգելով անմեղ զոհերի հիշատակը:
Այնուհետեւ ԱԺ նախագահը այցելեց «Ս.Թարգմանչաց» ազգային միջնակարգ վարժարան, զրուցեց աշակերտների, հոգաբարձուների խորհրդի անդամների և ուսուցիչների հետ:
ՀՀ ԱԺ նախագահ Հովիկ Աբրահամյանի գլխավորած պատվիրակությունը այցելեց «Օմայան» մզկիթ, որտեղ գրառում կատարեց պատվավոր հյուրերի գրքում: -0-