ԵՐԵՎԱՆ, 5 նոյեմբերի. /Նովոստի–Արմենիա/. Մոսկվան պատրաստ է աջակցել Երևանին Հարավային Սուդանում Ան-12 վթարի հետ կապված խնդիրների լուծման հարցում, հինգշաբթի երեկոյան ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։
Ավիավթարը տեղի է ունեցել չորեքշաբթի Ջուբա քաղաքի օդանավակայանից ոչ հեռու։ Ան–12–ը կործանվել է թռիչքի ժամանակ` թռիչքուղուց 800 մետր բարձրության վրա։ Տարբեր տվյալներով, զոհվել է մոտ 40 մարդ։ Ինքնաթիռի անձնակազմի հինգ անդամները հայեր էին, մյուսը` ռուս, ով էթնիկ հայ էր։
«Եթե Հայաստանից այդպիսի դիմում լինի, ապա Ռուսաստանն անհրաժեշտ օժանդակություն կցուցաբերի։ Մենք նախկինում էլ ենք աջակցություն ցուցաբերել նմանատիպ իրավիճակներում, անկախ նրանից, թե որ երկրրի քաղաքացիներ են եղել վթարների կամ այլ միջադեպերի զոհերը»,– ասել է Զախարովան։
Ըստ նրա, ռուսական կողմը կանոնավոր կերպով դիմումներ է ստանում տարբեր պետություններից և պատանդների մասին հարցով, և երրորդ երկրներում քաղաքացիների ճակատագրի հարցով, որտեղ, ըստ այդ պետությունների կարծիքով, Ռուսաստանը կարող է որևէ դեր խաղալ, ինչ–որ օժանդակություն ցուցաբերել։
ԱԳՆ–ն հրապարակել է Հարավային Սուդանում ընկած ԱՆ-12 ինքնաթիռի անձնակազմի հայ անդամների անունները>>
«Մենք միշտ ցուցաբերում ենք այդ աջակցությունը։ Ինչ–որ դեպքերի մասին մենք ձեզ տեղեկացնում ենք, մյուսների մասին չենք կարող տեղեկացնել, բայց վստահ կարող եմ ասել, որ անհրաժեշտ օժանդակությունը, հնարավոր օգնությունը կցուցաբերվի»,– նշել է ՌԴ ԱԳՆ պաշտոնական ներկայացուցիչը։
Նա ավելացրել է, որ Մոսկվան նաև շնորհակալ է մյուս երկրներին, որոնք աջակցություն են ցուցաբերում Ռուսաստանին նմանատիպ իրավիճակներում։ -0-
