ՀՀ վարչապետ. հայ–ռուսական հարաբերությունների հետհեղափոխական փուլն ավարտված է (ՎԻԴԵՈ)

ԵՐԵՎԱՆ, 28 սեպտեմբերի./Նովոստի–Արմենիա/. ԱՊՀ երկրների ղեկավարների գագաթնաժողովին մասնակցած ՀՀ վարչապետ Նիկոլ Փաշինյանը պատմել է ՌԴ նախագահ Վլադիմիր Պուտինի հետ կայացած կարճատև զրույցի բովանդակության մասին։

«Մենք քննարկել ենք հայ–ռուսական հարաբերությունների հարցերի լայն շրջանակ։ Կրկին անդրադարձել ենք նախորդ հանդիպումների ընթացքում քննարկված հարցերին։ Ինչպես արդեն ասել եմ, հայ–ռուսական հարաբերությունները անցում են կատարել նոր` աննախադեպ բարձր մակարդակի։ Ամփոփելով այսօրվա հանդիպման արդյունքները` կարող եմ արձանագրել, որ, ըստ էության, հայ–ռուսական հարաբերությունների հետհեղափոխական անցումային շրջանը կարելի է համարել ավարտված», – ասաց Փաշինյանը Facebook–յան իր էջում կազմակերպված ուղիղ միացման ժամանակ։

«ՌԴ նախագահի հետ մենք ունենք լիարժեք փոխըմբռնում, դա չի նշանակում, որ բոլոր հարցերի շուրջ համաձայն ենք և տարաձայնություններ չկան։ Ես կարծում եմ՝ մեր հարաբերություններում անլուծելի խնդիրներ չկան, կա հրաշալի աշխատանքային մթնոլորտ, և մենք ցանկացած հարց կարող ենք քննարկել միմյանց ներքին գործերին չմիջամտելու և միմյանց ինքնիշխանությունը հարգելու մթնոլորտում։ Այդ ամենը հնարավորություն է տալիս վաղ թե ուշ հասնել փոխըմբռնման», – նշեց ՀՀ վարչապետը։

Վարչապետը խոսեց նաև այն հարցի մասին, որ ինքն ամեն անգամ ՌԴ նախագահի հետ հանդիպելիս՝ խոսում է մեր երկրի ինքնիշխանության մասին, և դա պետք չէ դիտարկել որպես արտառոց մի բան։

«Հենց մեր առաջին հանդիպումից հետո այս հիմքի վրա են կառուցվել մեր հարաբերությունները։ Անկեղծ ասեմ՝ այդ թեման առաջինը բացել է Պուտինը Սոչիում։ ԵՏՄ գագաթնաժողովն էր, երբ հանդիպումից հետո ճաշի սեղանի շուրջ նա ասաց՝ ես գիտեմ, որ այդպիսի տեսակետ կա, որ ՌԴ ն բավարար հարգանքով չի վերաբերվում ԵՏՄ իր գործընկեր երկրների ինքնիշխանությանը։ Նա հավաստիացրեց, որ լիարժեք հարգանքով է վերաբերվում գործընկերների ինքնիշխանությանը, և, ընդհակառակը, ընդգծում է այդ սկզբունքի կարևորությունը», – ասաց Փաշինյանը` նշելով, որ սա կարևոր ձեռքբերում է երկրների միջև հարաբերություններում, ինչը հիմք է տալիս դրանց բնականոն զարգացման համար։–0–