ՀՀ ԱԳ նախարարը մեկնաբանել է Արցախի կարգավիճակի հարցով Փաշինյանի և ԵԱՀԿ ՄԽ համանախագահի հակասող հայտարարությունները (ՎԻԴԵՈ)

ԵՐԵՎԱՆ, 14 հունվարի./Նովոստի–Արմենիա/. ՀՀ ԱԳ նախարար Արա Այվազյանը մեկնաբանել է ՀՀ վարչապետ Նիկոլ Փաշինյանի և ԵԱՀԿ ՄԽ համանախագահ Իգոր Պոպովի հայտարարությունների հակասությունները։ 

Փաշինյանը հունվարի 4–ին հոդված էր հրապարակել` նշելով, որ 2013-ին ծնվում և 2015-ին վերջնականորեն ձևակերպվում են հիմա արդեն հանրահայտ ռուսական առաջարկները, որոնք նախատեսում են 7 տարածքների վերադարձը Ադրբեջանին՝ 5+2 բանաձևով, փախստականների վերադարձ, ռուս խաղաղապահների տեղակայում: Առաջարկությունների փաթեթը որևէ կերպ չէր անդրադառնում Լեռնային Ղարաբաղի կարգավիճակի հարցին, շրջանցում էր այդ հարցը: Հունվարի 13–ին Պոպովը նշել է, որ Ռուսաստանը երբեք չի առաջարկել Ադրբեջանին տալ Ղարաբաղի յոթ շրջանները` մոռանալով տարածքի կարգավիճակի մասին։

«Հնչել են տարբեր հայտարարություններ, պետք չէ դրանք ներկայացնել կոնտեքստից դուրս», – ասաց Այվազյանը` հրաժարվելով մեկնաբանել վարչապետի հայտարարությունը։

Նա նաև հիշեցրեց, որ Արցախի կարգավիճակը եղել և մնում է հակամարտության կարգավորման կարևորագույն սկզբունքը։

«Ես ծանոթացել եմ պարոն Պոպովի հարցազրույցին և պետք է նշեմ, որ ինչպես բոլորդ գիտեք, Հայաստանը ժամանակին իր համաձայնությունն էր տվել Կազանի փաստաթղթին, քանի որ այն պարունակում էր հակամարտության կարգավորման հիմնարար սկզբունքների ամբողջական փաթեթը։ Ադրբեջանի կողմից այդ փաստաթղթի մերժումից հետո էլ բանակցությունները շարունակվել են հիմնարար սկզբունքների հիման վրա: Ասեմ ավելին, նույնիսկ պատերազմի ժամանակ Ադրբեջանի կողմից տրվել էր համաձայնություն շարունակել բանակցությունները հիմնարար սկզբունքների  շուրջ: Ես միանշանակ համամիտ եմ պարոն Պոպովի հետ, որ Արցախի կարգավիճակը եղել է հակամարտության կարևորագույն սկզբունքը և կավելացնեմ՝ եղել է և մնում է այդպիսին», – ասաց Այվազյանը։

ՀՀ ԱԳ նախարարը նաև նշեց, որ նոյեմբերի 9-ի հայտարարությունը կարգավորման  փաստաթուղթ չէ։