ԱՄՆ Պետդեպարտամենտը մեկնաբանել է համաձայնագիրն Արցախի շուրջ

ԵՐԵՎԱՆ, 11 նոյեմբերի./Նովոստի–Արմենիա/. ԱՄՆ–ն ի գիտություն է ընդունել Լեռնային Ղարաբաղի համաձայնագիրը, սպասում է դրա իրականացման մանրամասներին և ուրախ կլինի բռնության դադարեցմանը, հայտնել են ՌԻԱ Նովոստիին ԱՄՆ Պետդեպարտամենտից։

 «Մենք ի գիտություն ենք ընդունել ռազմական գործողությունների դադարեցման մասին պայմանավորվածությունը, որը կնքվել է Ռուսաստանի միջնորդությամբ և շահագրգիռ կլինենք, որպեսզ ավելի շատ բան իմանանք այս նոր պայմանավորվածության իրականացման մանրամասների և ծրագրերի մասին այն ժամանակ, երբ այդ պայմանավորվածությունը սկսի ուրվագծվել։ Մենք ուրախ կլինենք տեսնել բռնության ավարտ, բայց դեռ չենք կարող մեկնաբանել հրադադարի կոնկրետ դետալները կամ հետագա քայլերը։ Հակամարտության կողմերին պետք է հարցնել, թե ինչպես են նրանք ընդունում նոր պայմանավորվածությունները», – ասել է Պետդեպարտամենտի ներկայացուցիչը։

Նա հիշեցրել է, որ ԱՄՆ–ն ի սկզբանե դատապարտել է բռնության էսկալացիան շփման գծի երկայնքով և մարդկային զոհերը։ 

Եռակողմ հայտարարության մասին

ՌԴ նախագահ Վլադիմիր Պուտինը նախօրեին հայտարարել է, որ Հայաստանի և Ադրբեջանի զինված ուժերը կանգ են առնում իրենց զբաղեցրած դիրքերում, իսկ Լեռնային Ղարաբաղի շփման գծի երկայնքով և Լեռնային Ղարաբաղը Հայաստանի Հանրապետության հետ կապող միջանցքով, տեղակայվում են Ռուսաստանի Դաշնության խաղաղապահ զորակազմ:

Լեռնային Ղարաբաղում ռազմական գործողությունների դադարեցման մասին համաձայնագիրը ենթադրում է նաև փախստականների վերադարձ տարածաշրջան:

Ներքին տեղահանված անձինք և փախստականները վերադառնում են Լեռնային Ղարաբաղի տարածք և հարակից տարածք` ՄԱԿ-ի փախստականների հարցերով գերագույն հանձնակատարի վերահսկողության ներքո:

Պետք է տեղի ունենա «ռազմագերիների, այլ կալանավորվածների և մահացածների մարմինների փոխանակում»: Տարածաշրջանի բոլոր տնտեսական և տրանսպորտային կապերն ապաարգելափակվում են: Տրանսպորտային հաղորդակցությունների նկատմամբ հսկողությունն իրականացվում է Ռուսաստանի Սահմանապահ ծառայության [ԱԴԾ] մարմինների օժանդակությամբ:  

Ռուսաստանի ղեկավարն ակնկալում է, որ «ձեռք բերված պայմանավորվածությունները անհրաժեշտ պայմաններ կստեղծեն Լեռնային Ղարաբաղի շուրջ ստեղծված ճգնաժամի երկարաժամկետ և ամբողջական ձևաչափով կարգավորման համար արդար հիմքի վրա և հայ և ադրբեջանցի ժողովուրդների շահերի համար»:-0-