ԵՐԵՎԱՆ, 23 մարտի./Նովոստի-Արմենիա/. Եվրոպայում գազի գինը 20%-ով կտրուկ աճել է ՌԴ նախագահ Վլադիմիր Պուտինի հայտարարությունից հետո:
Նշենք, որ Պուտինն այսօր հանձնարարել է ոչ բարեկամ երկրներ գազի մատակարարման համար վճարում կատարել ռուսական ռուբլով:
Ինչպես հաղորդում է
ՌԲԿ-ն, Նիդերլանդների TTF հանգույցում բնական գազի ապրիլյան ֆյուչերսի գինը կտրուկ աճել է 20%-ով (նախորդ օրվա փակման մակարդակի համեմատ)՝ հասնելով 1ՄՎտ/ժ-ի դիմաց 118,75 եվրոյի կամ 1000խմ-ի դիմաց ավելի քան 1370 դոլարի՝ հաշվի առնելով ներկա փոխարժեքը, վկայում են ICE բորսայի տվյալները: Մոսկվայի ժամանակով ժամը 16:41-ի դրությամբ ֆյուչերսների առուվաճառքն իրականացվում է 1 ՄՎտ/ժ-ի դիմաց 113,29 եվրոյով կամ 1000խմ-ի դիմաց 1189,55 դոլարով:
Եվրոպայում գազի բորսայական գները սկսեցին կտրուկ աճել այն բանից հետո, երբ ՌԴ նախագահ Վլադիմիր Պուտինը հանձնարարեց ոչ բարեկամ երկրների համար գազի վճարումներն իրականացնել ռուբլով: Այդ ցանկում ներառվել է ԵՄ մասնակից 27 երկիր:
Գազի մատակարարման դիմաց վճարումների նոր կարգը ՌԴ ԿԲ-ն կսահմանի շաբաթվա ընթացքում: Պուտինն ընդգծել է, որ գազի բոլոր օտարերկրյա գնորդները պետք է հնարավորություն ունենան ռուբլի գնել ՌԴ-ի ներքին շուկայում և իրականացնել հաշվարկներ հասկանալի և թափանցիկ ընթացակարգով:
Միաժամանակ Ռուսաստանը կշարունակի գազ մատակարարել այն ծավալներով, որոնք սահմանվել են ավելի վաղ կնքված պայմանագրերում:-0-