ԵՐԵՎԱՆ, 28 նոյեմբերի․/Նովոստի–Արմենիա/․ Ամերիաբանկի կողմից ֆինանսավորվող նախագծերի շնորհիվ 2023 թվականի 9 ամիսների ընթացքում Հայաստանում արտադրվել է ավելի քան 118 մլն կՎտժ «կանաչ» էլեկտրաէներգիա, ինչը հնարավորություն է տվել ավելի քան 57 հազար տոննայով նվազեցնել ածխաթթու գազի (CO2) արտանետումները։ Այս մասին ասաց Ամերիաբանկի վաճառքների և հարաբերությունների կառավարման բաժնի ղեկավար Էդուարդ Առաքելյանը Երևանում անցկացվող «Energy Week 2023» համաժողովի շրջանակում։
Նա պարզաբանեց, որ տվյալները ստացվել են Կլիմայի փոփոխության հարցերով միջկառավարական խմբի (IPCC) կողմից սահմանված համապատասխան գործակիցների միջոցով կատարված հաշվարկներով։
«Ամերիաբանկը ստանձնել է երկարաժամկետ պարտավորություն՝ ստեղծելու կայուն միջավայր և աջակցելու անցնմանն ածխածնային չեզոք տնտեսությանը։ Դեռևս 2020 թվականին բանկը թողարկեց և տեղաբաշխեց 42 միլիոն եվրո արժողությամբ կանաչ պարտատոմսեր, ինչը դարձավ առաջին նման ծրագիրը Հայաստանում», – ասաց նա։
Առաքելյանը նշեց, որ այսօր բանկն ունի 46 մլրդ դրամի կանաչ վարկերի համաձայնագրեր, որոնց մոտ 50%-ն արդեն տրամադրվել են մաքուր էլեկտրաէներգիայի արտադրության ոլորտում։
Այս տարվա սեպտեմբերի 30-ի դրությամբ Ամերիաբանկի վարկային պորտֆելի մասնաբաժինը էներգետիկ ոլորտի շուկայում կազմում է 33% (ավելի քան 35 մլրդ դրամ)։
«Այժմ մենք նաև մի քանի խոշոր ծրագրեր ենք իրականացնում ոլորտում, ինչը զգալիորեն կմեծացնեն բանկի պորտֆելը էներգետիկ ոլորտում»,- ասաց նա։
Առաքելյանն ասաց, որ վերջին տարիներին կանաչ ֆինանսավորումն ակտիվացել է բոլոր բաղադրիչներով, և այսօր աճի միտում ունի։
«Մենք՝ որպես առաջատար ֆինանսական կառույց, մեծ նշանակություն ենք տալիս այս ոլորտի զարգացմանը և մեր պորտֆելում նրա մասնաբաժնի շարունակական աճին։ Այդ ուղղությամբ մենք լուրջ քայլեր ենք ձեռնարկում»,- ասաց նա։
Նրա խոսքով, վերջին երկու տարիներին արևային էներգիայի ոլորտը գտնվում է իր գագաթնակետում, բանկը ֆինանսավորել և ֆինանսավորում է բավականին խոշոր ծրագրեր այս ուղղությամբ։ Առաքելյանը հույս հայտնեց, որ ոլորտը կշարունակի զարգանալ։
«Ամերիաբանկ» ՓԲԸ
Ամերիաբանկը ֆինանսական և տեխնոլոգիական առաջատար հաստատություն է, ՀՀ տնտեսական ոլորտի նշանակալի դերակատարներից մեկը, որի ակտիվները գերազանցում են 1 տրիլիոն ՀՀ դրամը: Ընթանալով թվայնացման ճանապարհով` Բանկը ներդրել է մի շարք նորարար ծրագրեր ու հարթակներ և շարունակում է կատարելագործել դրանք` ձևավորելով մարդու տարատեսակ կարիքների բավարարմանն ուղղված, դինամիկ զարգացող ֆինանսա-տեխնոլոգիական միջավայր:
Լինելով հաճախորդամետ` Ամերիան ձգտում է ժամանակակից թվային աշխարհում ապահովել սպասարկման բարձր որակ` վստահելի և անվտանգ միջավայրում առաջարկելով կյանքի որակը բարելավելու ամբողջական լուծումներ:
Բանկը վերահսկվում է ՀՀ Կենտրոնական բանկի կողմից:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
