Հայաստանում բարձր վարձատրվող մասնագիտությունների հնգյակը

ԵՐԵՎԱՆ, 13 հոկտեմբերի. /Նովոստի–Արմենիա/. 2018 թ.–ի բյուջեի նախագծով ՀՀ–ում աշխատավարձերի և թոշակների բարձրացում չի նախատեսվում, այս մասին կառավարության հերթական նիստի ժամանակ հայտարարել է ՀՀ ֆինանսների նախարար Վարդան Արամյանը։ Նա նշել է, որ 2018 թ.–ին, ինչպես նախորդ երկու տարիներին, չի նախատեսվում սոցիալական ծախսերի ավելացում։ Նախարարի խոսքով, պետությունը չի կարող իր վրա վերցնել նոր սոցիալական պարտավորություններ, քանի որ պետք է կայունացնի իր տնտեսական հնարավորություններն ու ներուժը։ Այս ամենի համատեքստում «Նովոստի–Արմենիա» գործակալությունը որոշեց կազմել հայկական տնտեսության ամենաբարձր վարձատրվող ոլորտների վարկանիշը` ՀՀ ազգային վիճակագրական ծառայության տվյալների հիման վրա։

Այսպիսով, ԱՎԾ–ի տվյալների համաձայն` ՀՀ տնտեսության ամենաբարձր վարձատրվող ոլորտը, 2017 թ.–ի առաջին կիսամյակի արդյունքներով, տեղեկատվական տեխնոլոգիաների և կապի ոլորտն է։ Այս ոլորտում զբաղված աշխատակցի միջին ամսական անվանական աշխատավարձը կազմել է 438 415 դրամ։



Երկրորդ հորիզոնականում ֆինանսների և ապահովագրական գործունեության ոլորտն է, որտեղ ֆինանսիստների և ապահովագրական գործակալների աշխատավարձը հասնում է 405 719 դրամի։


  


Երրորդը լեռնահանքային արդյունաբերության ոլորտն է, որտեղ միջին ամսական աշխատավարձը կազմել է 396 518 դրամ։



Չորրորդ հորիզոնականում է էներգետիկայի ոլորտը, որտեղ միջին ամսական աշխատավարձը 271 781 դրամ է։




 Եվ վերջապես 5–րդ հորիզոնականում է պետական կառավարման, պաշտպանության և պարտադիր սոցիալական ապահովության ոլորտը, որտեղ միջին ամսական աշխատավարձը, այս տարվա առաջին կիսամյակի արդյունքում, կազմել է 218 463 դրամ։



Հայաստանում միջին ամսական անվանական աշխատավարձը 2017 թ.–ի 6 ամսում ընդհանուր առմամբ կազմել է 187 643 դրամ, ինչը 2,4 տոկոսով ավել է 2016 թ.–ի ցուցանիշից, ինչի մասին են վկայում ՀՀ ԱՎԾ–ի տվյալները։

Միաժամանակ ՀՀ–ում ամենաբարձր աշխատավարձերը գրանցված են Սյունիքի մարզում` 286 874 դրամ և Երևանում` 206 093 դրամ, իսկ ամենացածրը` Արագածոտնում` 120 918 դրամ և Շիրակում`133 110 դրամ։


ՀՀ–ում հայտնի JobFinder.am պորտալի վիճակագրության համաձայն` ընթացիկ կիսամյակում ամենապահանջվածը շարունակում է մնալ տեղեկատվական տեխնոլոգիաների ոլորտը` բոլոր թափուր տեղերի մոտ 28 տոկոսը։ Գործատուների 547 ծանուցում բաժին է հասնում հենց ՏՏ ոլորտին։

Թափուր աշխատատեղերի առաջին հնգյակում են նաև բանկերն ու ֆինանսական կառույցները` 323 հայտարարություն, վաճառքների ոլորտը` 272, ադմինիստրատիվ/գրասենյակային ոլորտը` 170, գովազդը, մարկետինգն ու PR–ը` 111 հայտարարություն։

JobFinder.am պորտալում 2017 թ.–ի առաջին կիսամյակի ընթացքում հրապարակվել է թափուր աշխատատեղի 1933 հայտարարություն։–0–