ԵՐԵՎԱՆ, 26 փետրվարի․/Նովոստի–Արմենիա/․ Այսօր կան բազմաթիվ գաղափարներ, թե ինչպես կարելի է զբաղվել բիզնեսով առցանց՝ օգտագործելով միայն նոութբուք, հեռախոս և ինտերնետ, այդ թվում նրանց համար, ովքեր անփորձ են։ «Նովոստի–Արմենիա» գործակալությունը ներկայացնում է առցանց գումար վաստակելու 9 տարբերակ՝ կախված նախասիրություններից ու հնարավորություններից։
1․ Բլոգի ստեղծում․ բլոգը օրագիր է, որտեղ հետաքրքիր ձևով անդրադառնում եք ձեր սիրելի գործին կամ հոբբիին: Լավ առաջխաղացում ապահովված բլոգի օգնությամբ կարելի է գումար վաստակել ոչ միայն գովազդով, այլ նաև փոխկապակցված հղումների, գովազդային հոդվածների և տեսանյութերի միջոցով: Ընդ որում ձեր ներդրումները կլինեն նվազագույն. անհրաժեշտ է գնել միայն դոմեյն և հոսթինգ: Հիմա բլոգերի ամենատարածված տեսակներից է վիդեոբլոգինգը։ Տեսանյութը կոնտենտի ամենատարածված տեսակներից է: Դուք կարող եք դառնալ վիդեոբլոգեր և կիսվել վիդեոբլոգերով Youtube-ում, Vimeo-ում, Dzen-ում, VK-ում կամ ձեր բլոգում:
2. Քոփիրայթինգ․ քոփիրայթինգը ենթադրում է համոզիչ մարկետինգային և գովազդային նյութերի ստեղծում, որոնք նախատեսված են տեղեկագրերի, էլեկտրոնային նամակների, վաճառքի էջերի, գովազդային վահանակների և այլ հարթակների համար։ Եթե կարողանում եք գրել նյութեր, որոնք ավելացնում են բրենդի ճանաչվածությունը կամ համոզում են մարդկանց կատարել գործողություն, օրինակ՝ գնել ապրանք, մտածեք քոփիրայթինգի մասին։
3․ Դրոփշիփինգ․ այն առցանց բիզնեսի հայտնի մոդել է։ Ի տարբերություն ապրանքների սովորական սպառման, դրոփշիփինգը թույլ է տալիս գումար չծախսել ապրանքների գնման և պահպանման համար։ Սա վաճառքի սխեմա է, որի դեպքում դրոփշիփերը՝ վաճառողը, միայն պատվերներ է ընդունում գնորդներից, իսկ ապրանքները պահում և ուղարկում է մատակարարը։ Ապրանքի իրացումից հետո դրոփշիփերը, որի հիմնական խնդիրը վաճառքի հարթակ ստեղծելն ու հաճախորդներ ներգրավելն է, միջնորդավճար է ստանում։ Այսպիսով, պետք չէ ոչ վարձակալել պահեստ, ոչ գումար ու ժամանակ ծախսել նախնական գնումների վրա։ Այս գաղափարի իրագործման համար կպահանջվի միայն գտնել մատակարարներ, որոնք պատրաստ են աշխատել դրոփշիփինգ ձևաչափով։ Նման մատակարարներ կան հիմնականում հագուստի և կոշկեղենի վաճառքով զբաղվողների շրջանում։
4․ Առցանց սրբագրում և խմբագրում․ քանի դեռ կա կոնտենտի մեծ պահանջարկ, միշտ էլ խմբագիրների և սրբագրողների կարիք կլինի: Միգուցե, ձեր քերականական և ուղղագրական հմտություններն անթերի են, և դուք կարող եք նկատել գրավոր տեքստի սխալները: Դուք կարող եք օգտագործել առցանց սրբագրում և խմբագրում՝ որպես բիզնես գաղափար, որպեսզի օգնեք ձեր հաճախորդներին հրապարակել քերականական սխալներից զերծ կոնտենտ:
5․ Տեսանյութերի խմբագրում․ տեսանյութերի խմբագրման ծրագրերի տիրապետումը, ինչպիսիք են Adobe Premiere-ը կամ Final Cut-ը, հեշտ գործ չէ: Բայց, եթե դուք արդեն ունեք այս հմտությունները, կարող եք դրանք վերածել եկամտաբեր բիզնեսի՝ առցանց վաճառելով տեսանյութերի խմբագրման ծառայություններ: Upwork-ի և Fiverr-ի նման հարթակները կօգնեն հաճախորդներ գտնել և մեծացնել եկամուտը:
Instagram–ում կարճ տեսանյութերի (մինչև 60 վայրկյան)՝ Reels–երի ստեղծման շնորհիվ հիմա տարածվել է նոր մասնագիտություն՝ reelsmaker։ Այն պահանջված է նաև Հայաստանում, ինչպես նաև ամբողջ աշխարհում։ Reelsmaker–ները զբաղվում են բլոգերների և առցանց բիզնեսների համար վիդեո կոնտենտի ստեղծմամբ, խմբագրմամբ և առաջխաղացմամբ, ինչը նրանց համար եկամտի աղբյուր է։ Կադրերը խմբագրելու համար պրոֆեսիոնալ վիդեո խմբագրման ծրագրեր պետք չեն: Անհրաժեշտ կլինի ունենալ բջջային հատուկ հավելվածներ։
6․ Պատվերով կայքերի ստեղծում․ եթե ունեք բավարար հմտություններ ծրագրավորման ոլորտում, կարող եք պատվերով կայքեր ստեղծել և լավ եկամուտ ստանալ դրանց վաճառքից։
7․ Առանց թարգմանության ծառայություններ․ եթե վարժ տիրապետում եք մի քանի լեզուների, կարող եք ձեր հմտությունները վերածել թարգմանչական շահավետ բիզնեսի: Լավ թարգմանիչները հազվադեպ են հանդիպում, բայց ձեր լավ հմտություններով դուք կարող եք մի քանի աշխատանք գտնել այնպիսի հարթակներում, ինչպիսիք են Tranzilla-ն կամ Freelance-ը:
8․ Առցանց կրկնուսուցում․ եթե լավ գիտեք ինչ–որ առարկա կամ թեմա, կարող եք ուրիշներին սովորեցնել այն, ինչ գիտեք: Կարող եք գրանցվել Cloudlessons-ի նման հարթակում և սկսել մասնավոր առցանց դասեր առաջարկել ուսանողներին: Բացի այդ, կարող եք ստեղծել մասնավոր խումբ Telegram-ում կամ Vk-ում՝ ուսանողներին սովորեցնելու համար:
9․ Լուսանկարների վաճառք․ պատկերների բանկի օգնությամբ կարող եք գումար վաստակել ձեր լուսանկարների միջոցով: Այսպես, եթե ունեք հետաքրքիր և բարձրորակ լուսանկարների ընտրանի, կարող եք դրանք վաճառել այնպիսի հարթակների միջոցով, ինչպիսիք են Shutterstock-ը, iStockPhoto-ն կամ Adobe Stock-ը: Այս ֆոտոսթոքերը հանդես են գալիս որպես միջնորդ լուսանկարների հեղինակի և այն օգտատերերի միջև, ովքեր ցանկանում են գնել դրանք: Հիմնական պահանջն այն է, որ լուսանկարները պետք է լինեն հեղինակային և բարձրորակ: Եկամտի այս ձևը հիանալի լուծում է պասիվ եկամտի համար, որը հարմար է ինչպես պրոֆեսիոնալ, այնպես էլ սիրողական լուսանկարիչներին: Յուրաքանչյուր ֆոտոսթոք առաջարկում է համագործակցության իր պայմաններն ու վճարները, ինչպես նաև պատկերների պահանջները: Ձեր յուրաքանչյուր լուսանկարի վաճառքից դուք կստանաք որոշակի գումար։ Եվ որքան շատ լավ լուսանկարներ ունենաք, այնքան շատ կլինեն գումար վաստակելու հնարավորությունները:
Եվ վերջում․․․
Հասկանալի է, որ սա ինտերնետում գումար աշխատելու ձևերի ամբողջական ցանկը չէ: Այս բիզնես գաղափարներից յուրաքանչյուրը կարող է օգնել ձեզ դառնալ անհատ ձեռնարկատեր և վաստակել զգալի եկամուտ: Եթե որոշել եք ընտրել դրանցից որևէ մեկը, ապա զգույշ եղեք, որպեսզի ինտերնետ ռեսուրս փնտրելիս չբախվեք խաբեբաների հետ: Օգտվեք միայն վստահելի աղբյուրներից և կայքերից, որոնց հետ աշխատելը հեշտ է և հարմար: Ընտրեք հարմար բիզնես գաղափար՝ ըստ ձեր հետաքրքրությունների, հմտությունների և ներդրումային հնարավորությունների:
Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-
