ԵՐԵՎԱՆ, 23 հունիսի. /Նովոստի-Արմենիա/. Մշակութային հաճելի իրադարձություն է սպասվում Երևանում հունիսի 29-ին:
25–ամյա հայ դաշնակահար, միջազգային և հանրապետական մրցույթների դափնեկիր, «Concours International de Piano Nice Côte d’Azur» դաշնակահարների 9-րդ միջազգային մրցույթի գավաթակիր Արմեն-Լևոն Մանասերյանի մենահամերգ/ցուցահանդես/ձայնասկավառակի շնորհանդեսը տեղի կունենա Կոմիտասի Թանգարան-Ինստիտուտում: Այս մասին հայտնում է թանգարանի
մամուլի ծառայությունը:
Ինչպես գրել է ինքը` երաժիշտը, Facebook-ի իր էջում, այս նախագծով ինքն արդեն հանդես է եկել մի շարք երկրներում (Պորտուգալիա, Մալթա, Ֆրանսիա, Գերմանիա, Բելգիա և այլն) և այժմ անհամբեր սպասում է ներկայացնել հայ ունկնդրին։
Ծրագրում կհնչեն Կոմիտասի «Դաշնամուրային պարերը», Ֆրեդերիկ Ռժևսկու «Winnsboro cotton mill blues»-ը և Մոդեստ Մուսորգսկու «Պատկերներ ցուցահանդեսից» ցիկլը, որն առաջին անգամ կներկայացվի երիտասարդ դաշնակահարի 10 նկարների տեսքով:
Միջոցառման սկիզբը` 19:00-ին: -0-