ԵՐԵՎԱՆ, 11 ապրիլի./Նովոստի–Արմենիա/. Տրանսգենդերի դեմ ակցիայի մասնակցած Տ. Ղազար քահանա Պետրոսյանը հայտարարվել է փիլոնազուրկ:
Ապրիլի 8–ին խորհրդարանի մոտ տեղի ունեցած բողոքի ակցիայի ժամանակ տեր Ղազարը շատ հուզական արտահայտել է իր վրդովմունքն ԱԺ ամբիոնից տրանսգենդերի ելույթի վերաբերյալ` կոչ անելով փակել փողոցը։ Նա փորձել է անցնել խորհրդարանի շենք, որ «օծի պղծված դահլիճը», սակայն նրան կանգնեցրել են Ոստիկանության աշխատողները։
Загружается новость ... "Лево"
Ինչպես հայտնում է Արարատյան Հայրապետական թեմի տեղեկատվական բաժինը, քահանան փիլոնազրկվել է վերջին օրերին հոգևորականին ոչ հարիր կեցվածքի, իր հովվական առաքելությունից շեղվելու, հուզական պոռթկումների տակ ճշմարտությունից հեռանալու համար:
«Պատիժը կտևի մինչև Ավագ Շաբաթ և գտնվում է ԱՀԹ Արարատի մարզի հոգևոր տեսուչ Գերաշնորհ Տ. Գևորգ եպիսկոպոս Սարոյանի հսկողության ներքո»,- ասվում է հաղորդման մեջ:
Նշվում է, որ ինչպես բոլոր հոգևորականները, Տեր Ղազարն իրավունք ունի իր վրդովմունքն արտահայտելու այլասերության քարոզի շուրջ, սակայն անընդունելի է քաղաքական հայտարարություններ անելը և քաղաքացուն ոչ հարիր կեցվածք ցուցաբերելը:
Միաժամանակ, Արարատյան Հայրապետական թեմն իր մտահոգությունն է հայտնում վերջին շրջանում առավել ակտիվացած օտարածին արժեքների քարոզչության շուրջ:
«Կոչ ենք անում մեր հավատավոր ժողովրդին մեկտեղվել ազգային ու հոգևոր արժեքների պահպանության առաքելության շուրջ, զերծ մնալ ավելորդ ու ծայրահեղ դրսևորումներից՝ ի շահ մեր ժողովրդի և մեր պետականության»,– ասվում է տեղեկատվական համակարգի հաղորդման մեջ։
Ինչպես ընդգծվում է հայտարարության մեջ, Հայ Եկեղեցու հոգևորականների կողմից բազմիցս բարձրաձայնվել է, որ Հայ Առաքելական Եկեղեցին չի դատապարտում որևէ անձի՝ հավատալով, որ յուրաքանչյուրն Աստծո առաջ ապաշխարելու, մեղքերի թողություն ստանալու և դարձի գալու հնարավորություն ունի: Սակայն Եկեղեցին խստորեն դատապարտում է մեղքն ու մեղքի քարոզը:
«Ցավով նկատում ենք, որ այլասերության ու անբարոյականության ակտիվացած քարոզը առավել բևեռացնում է մեր ժողովրդին: Համաշխարհային մարտահրավերներին ընդառաջ մեզ առավել քան երբևէ պետք է համախմբված ու մեկտեղված լինել՝ մեր պետականությունն առավել ամուր ու հզոր դարձնելու գործում՝ առաջնորդվելով ազգային և հոգևոր արժեքներով:
Դատապարտելով այլասերության քարոզի բոլոր դրսևորումներն՝ այդ ամենի դեմ պայքարում կարևորում ենք խոհեմ ու քաղաքակիրթ կեցվածքը»,– ասվում է հաղորդման մեջ։ -0-