ԵՐԵՎԱՆ, 15 հուլիսի./Նովոստի–Արմենիա/. Հայաստանի քաղաքացիական ավիացիայի կոմիտեի ղեկավար Տաթևիկ Ռևազյանը, ամփոփելով պաշտոնավարման մեկ տարին, անդրադարձավ նաև պատգամավորի այն արտահայտությանը, որը մեծ իրարանցում առաջացրեց հայ հասարակությունում։
Ավելի վաղ վրաց–ռուսական հարաբերությունների լարվածության կապակցությամբ պատգամավոր Էդմոն Մարուքյանն իր Facebook-ում ուղիղ եթեր է մտել, որում կոչ է արել ավելացնել Գյումրիից Ռուսաստան չվերթերի թիվը։ «Կոչ եմ անում շատ սիրուն աղջկան (Ռևազյան` խմբ.) և մեր փայլուն աշխատող կառավարությանը, որ այդ օրերին արագ քայլեր ձեռնարկեն և կարգավորեն այդ խնդիրը։ Մենք պարզապես չպետք է բաց թողնենք այդ հնարավորությունը», – ասել է Մարուքյանը։ Պատգամավորի «սիրուն աղջիկ» ձևակերպումը խորհրդարանում բուռն խոսակցությունների առիթ է դարձել, մասնավորապես, «Իմ քայլը» խմբակցության մի շարք պատգամավորներ Մարուքյանին կոռեկտության կոչ են արել։
«Կխնդրեի մեր կլասիկ պատգամավորին լայվ մտնելուց առաջ հետաքրքրվել մեզանից և իմանալ, որ այդ պահին մենք արդեն ծավալուն միջոցառումներ ենք իրականացրել Հայաստանով թռիչքների ավելացման ուղղությամբ։ Արդյունքում միայն Armenia Aircompany–ն հուլիսի 8–ից դեպի Մոսկվա շաբաթական 14ժական չվերթ է կատարում, ինչը շատ բարձր ցուցանիշ է»,– ասաց Ռևազյանը։
Загружается новость ... "Лево"
Նրա խոսքով, չվերթերի թիվն ավելացրել են նաև ռուսական ավիաընկերությունները, և դեպի Բաթումի նոր ուղղություն է բացվել։
Ռևազյանի խոսքով, իրեն Մարուքյանի արտահայտությունը չի վիրավորել, այլ մի փոքր ծիծաղեցրել է։
«Ինձ համար կարևոր է մտածողության փոփոխությունը Հայաստանում, որ մենք սովորենք, որ պաշտոնյան Հայաստանում պարտադիր չէ, որ լինի տարիքով մեծ, մեծ փորով, ճաղատ, կոռումպացված, այլ սովորենք նոր կերպարի։ Ես չեմ համապատասխանել ոչ մի չափանիշի մինչև պաշտոնը ստանձնելը, և շատերը դժվարությամբ էին դա ընկալում Հայաստանում, բայց միջազգային հարթակում էֆեկտը հակառակն էր, նրանք իրենց թույլ չեն տալիս խոսել գեղեցկության մասին, քանի որ դա պրոֆեսիոնալ չէ»,– ասաց Ռևազյանը։ -0-