ԵՐԵՎԱՆ, 11 մարտի./Նովոստի–Արմենիա/. ՀՀ առողջապահության նախարար Արսեն Թորոսյանն այսօր մեկնաբանել է առողջապահական համակարգի մի խումբ աշխատակիցների կողմից հնչող մեղադրանքներին այն մասին, որ նա զբաղվում է «գործ տալով»։
Առողջապահական համակարգի մի խումբ աշխատակիցներ անանուն հայտարարություն են տարածել, որում նախարարին անվանել են «գործ տվող», ով իր առջև նպատակ է դրել գրել որքան հնարավոր է շատ գրություններ ոլորտի աշխատակիցների հասցեին։ Թորոսյանի գրությունների հիման վրա հարուցվել են քրեական գործեր, մասնավորապես, բժշկական կենտրոններից մեկի տնօրենի, նախկին փոխնախարարի, ինչպես նաև առողջապահության ոլորտի մի շարք այլ ներկայացուցիչների նկատմամբ։
«Ես չեմ հաշվում քննչական մարմիններ ուղարկված ծառայողական գրությունները, քանի որ դա չէ իմ աշխատանքի հիմնական նպատակը։ Չեմ մեկնաբանում գործընկերների հայտարարությունները, սակայն իմ պարտքն եմ համարում իրազեկել իրավապահ մարմիններին իավախախտումների բոլոր դեպքերի մասին։ Եթե կա մի պաշտոնյա, որը իրավախախտման մասին չի հայտնում իրավապահ մարմիններին, ապա նա թաքցնում է իրավախախտումը», – ասաց Թորոսյանը։
Միաժամանակ նա ձեռնպահ մնաց ներկայացնել վերջին գործի մանրամասները, որը հարուցվել է առողջապահության նախկին փոխնախարարի նկատմամբ` ընդգծելով, որ գործով քննություն է ընթանում։
ՀՀ ՔԿ–ն մարտի 7–ին հաղորդագրություն տարածեց այն մասին, որ ձերբակալվել է ՀՀ առողջապահության նախկին փոխնախարար Վ. Պողոսյանը «Տուբերկուլյոզի դեմ պայքարի ազգային կենտրոն» ՊՈԱԿ-ում հայտնաբերված չարաշահումների դեպքի առթիվ։
Նախարարը նաև ընդգծեց, որ չի զբաղվում քննությամբ, այլ ապահովում է համակարգի նորմալ և արդյունավետ աշխատանքը։
«Քննչական մարմնի հայտարարության մեջ կա անհրաժեշտ ողջ տեղեկատվությունը, որը չի խոչընդոտում քննության ընթացքում, մնացածը ես չեմ կարող ներկայացնել», – պարզաբանեց նախարարը։–0–