ԵՐԵՎԱՆ, 11 մարտի. /Նովոստի–Արմենիա/.
Forbes հեղինակավոր հրատարակությունը հրապարակել է ռուսաստանաբնակ հայազգի միլիարդատերերի անունները, որոնք կարող են ազդել Հայաստանում ուժերի քաղաքական դասավորվածության, մասնավորապես` խորհրդարանական ընտրությունների արդյունքների վրա։
«Սամվել Կարապետյանը, Ռուբեն Վարդանյանը, Սերգեյ Համբարձումյանն ու Սարկիսով եղբայրները (Նիկոլայն ու Սերգեյը, Forbes) ռուսաստանաբնակ հայազգի ազդեցիկ գործարարներ են, ովքեր ակտիվորեն ներդրումներ են կատարում Հայաստանի տնտեսության մեջ` դառնալով լուրջ գործոն երկրի հասարակական–քաղաքական կյանքում», – գրում է հրատարակությունն ու նշում, որ նրանց ներդրումները գործարկված են Հայաստանի գրեթե յուրաքանչյուր հաջող նախագծում։
Forbes–ը գրում է, որ այս ազդեցիկ գործարարները ներդրումներ են կատարում Հայաստանում` չակնկալելով որևէ զգալի եկամուտ։ Նրանք ակնկալում են ստանալ «իմիջային և քաղաքական դիվիդենտներ»։
«Օրինակ, Սերգեյ և Նիկոլայ Սարկիսովները 2013 թ.–ին նշանակվել էին Լոս Անջելեսում (ԱՄՆ) և Լիոնում (Ֆրանսիա) Հայաստանի գլխավոր հյուպատոսներ», – նշում է հրատարակությունը։
Հրապարակման մեջ նաև նշվում է, որ քաղաքական տեսակետից Ռուսաստանում հայկական սփյուռքի կառույցների առաջնորդներն ավանդաբար սերտ կապերի մեջ են պաշտոնական Երևանի իշխանությունների հետ։
Forbes–ի վարկածով, երկրի քաղաքական ուղղվածության հարցում Հայաստանի բնակչության աճող դժգոհությունը, ինչպես նաև ընդդիմադիր քաղաքական կառույցների նկատմամբ արևմտահայկական սփյուռքի (մասնավորապես ԱՄՆ և Ֆրանսիա) համակրանքը ռուսաստանաբնակ հայազգի գործարարներին դարձնում են «անայլընտրանքային դաշնակիցներ» պաշտոնական Երևանի համար։
«Այսպիսով, առաջիկա ընտրություններին հայկական սփյուռքի ֆինանսական վերնախավի գործոնը կարող է դառնալ առանցքայիններից մեկը», – նշում է հրատարակությունը։–0–