ԵՐԵՎԱՆ, 13 նոյեմբերի. /Նովոստի Արմենիա/. «ՎԵՈՆ» հեռահաղորդակցական ընկերությունը, որը հայկական շուկայում ներկայացված է «ՎԵՈՆ Արմենիա» ընկերությամբ (Beeline ապրանքանիշ), նախատեսում է գնել «Ռոստելեկոմ Արմենիան»։
Փաստ
Հայկական ԶԼՄ–ները, հղում անելով անանուն աղբյուրների, տեղեկացնում էին, որ «ՎԵՈՆ Արմենիա» ընկերությունն (Beeline ապրանքանիշ) իրականացնում է «Ռոստելեկոմ Արմենիա» ընկերության խորը ուսումնասիրություն (duediligence)` այն հետագայում գնելու նպատակով։
Պաշտոնական դիրքորոշում
Տեղական ընկերություններում այս տեղեկությունը պաշտոնապես չեն մեկնաբանում` նշելով, որ նման հարցմանը կարող են պատասխանել միայն գլխավոր բաժնետերերը` «ՎԵՈՆ» և «Ռոստելեկոմ» ընկերությունները, քանի որ duediligence ընթացակարգն անցկացվել է բացառապես նրանց հանձնարարությամբ։
Ի՞նչ է ցույց տվել հետաքննությունը
Ինչպես «Նովոստի Արմենիա» գործակալությանը հայտնեցին սեփական աղբյուրները, «Ռոստելեկոմ Արմենիա» ընկերությունը գնելու բանակցություններն իսկապես ընթանում են, ընդ որում արդեն բավականին երկար ժամանակ։ Ներկա պահին քննարկումներում մասնակցում են միայն ընկերությունների գլխավոր գրասենյակների ներկայացուցիչներն Ամստերդամում (Beeline) և Մոսկվայում (Ռոստելեկոմ)։ Ընդ որում, ընկերությունների ղեկավարները դեռ չեն ընդունել վերջնական որոշում, չնայած արդեն նախանշվում է հնարավոր վերջնաժամկետը` նոյեմբերի վերջ։
Загружается новость ... "Лево"
Բջջային միաձուլումներ Հայաստանում
Հայաստանն արդեն փորձ ունի հեռահաղորդակցական ոլորտում խոշոր օպերատորների միաձուլման գործում։ Դրա վառ օրինակն է տեղական հեռահաղորդակցական ընկերության` «Ucom»–ի կողմից Orange ֆրանսիական օպերատորի (France Telecom) «կլանումը», որը հայկական շուկա էր դուրս եկել 2009 թվականի նոյեմբերին, իսկ 2015 թ.–ի սեպտեմբերին «Ucom»–ը գնեց Orange Armenia բջջային ընկերության բաժնետոմսերի 100 տոկոսը։
Ընդ որում, 2016 թ.–ի գարնանը հայկական ԶԼՄ–ներում տեղեկություն հայտնվեց այն մասին, որ Ucom ընկերությունը բանակցում է «Մեգաֆոն» ռուսական հեռահաղորդակցական ընկերության հետ «Orange Armenia»–ն վաճառելու շուրջ, սակայն ավելի ուշ Ucom–ը հերքեց այդ տեղեկությունը։
«ՎԵՈՆ Արմենիա» ՓԲԸ-ն (Beeline ապրանքանիշ) հանդիսանում է «Վեոն» ընկերությունների խմբի մի մասը, որը հանդիսանում է աշխարհի խոշորագույն ինտեգրված օպերատորներից մեկը: Ընկերությունների խումբն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման, այնպես էլ լայնաշերտ ինտերնետ հասանելիության ծառայություններ ավելի քան 235 մլն. բաժանորդների Ռուսաստանում, Իտալիայում, Ուկրաինայում, Ղազախստանում, Ուզբեկստանում, Տաջիկստանում, Հայաստանում, Վրաստանում, Ղրղզստանում, Լաոսում, Ալժիրում, Բանգլադեշում և Պակիստանում: «ՎիմպելԿոմ» խմբի ընկերությունները ծառայություններ են մատուցում «Beeline», «Киевстар», «Wind», «Mobilink», «Banglalink» և «Djezzy» ապրանքանիշերի ներքո: Մանրամասներին կարելի է ծանոթանալ www.veon.com կայքում:
«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։
Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–