ԵՐԵՎԱՆ, 9 հունիսի. /Նովոստի–Արմենիա/. «Ավրորա» միջազգային մարդասիրական մրցանակը ստեղծվել է ոչ միայն հիշեցնելու համար Օսմանյան կայսրությունում Հայոց ցեղասպանության մասին, այլ նաև որ իր ավանդն ունենա ապագայում նման չարագործությունների կանխման գործում, շաբաթ հայտարարել է մրցանակի համահիմնադիր, Նյու Յորքում Կարնեգի կորպորացիայի տնօրեն Վարտան Գրեգորյանը` բացելով Երևանում «Ավրորայի երկխոսություններ» երրորդ համաժողովը։
«Ավրորայի երկխոսությունների» շրջանակում հաջողակ գործարարները, պետական և հումանիտար ականավոր գործիչները Երևանում քննարկում են առկա մարդասիրական խնդիրները։ Համաժողովում վերլուծվել են նաև «Ավրորա 2018» հումանիտար ինդեքսի արդյունքները` դա համաշխարհային գլխավոր հումանիտար մարտահրավերների հանրային ընկալման ամենամյա հարցում է։
«Դա տնտեսական կամ քաղաքական նախագիծ չէ։ Դա զուտ հումանիտար նախաձեռնություն է, որի նպատակը գլոբալ մարտահրավերների լուծումն է»,– ասաց Գրեգորյանը։
Նրա խոսքով, «Ավրորայի» ստեղծողները նաև նպատակ չեն ունեցել Հայոց ցեղասպանությունն ավելի «բարձր դասել» հրեաներին, հույներին, ասորիներին և մյուս ժողովուրդներին բաժին հասած նմանատիպ ողբերգություններից, այլ հերթական անգամ բարձրաձայնել մարդկային արժեքների օրակարգը։
Загружается новость ...
"Право"
«Հայոց ցեղասպանությունից մեկ դար անց «Ավրորան» փորձում է քայլ անել հայ ժողովրդի զոհերի մասին հիշեցնող նոր ցեղասպանությունների կանխման ուղղությամբ։ Մենք չենք սահմանփակվում միայն Հայաստանով կամ Եվրոպայով, այլ ընգրկում ենք Ասիայի և Աֆրիկայի խնդիրները։ Նախաձեռնությունը հաստատում է, որ մեր ազգը ոչ թե փոխհատուցման է սպասում, այլ հարգանքի տուրք է մատուցում զոհերին։ Բայց ազգի հզորությունը պատասխանատվությունն է»,– ընդգծել է Գրեգորյանը։
«Ավրորա» մարդասիրական նախաձեռնությունը, որն ստեղծվել է Հայոց ցեղասպանությունը վերապրողների անունից՝ ի երախտագիտություն նրանց փրկողների, ձգտում է հնարավորություն տալ մերօրյա հերոսներին՝ կյանք և հույս պարգեւել նրանց, ովքեր մարդասիրական աջակցության խիստ կարիք ունեն ողջ աշխարհում, այսպիսով՝ շարունակել մարդասիրության շղթան աշխարհով մեկ: «Ավրորա» մարդասիրական նախաձեռնությունը գործով արտահայտված երախտագիտություն է: Այն նպատակ ունի ութ տարի շարունակ (2015-2023թթ.՝ ի հիշատակ ութ տարի տեւած Հայոց ցեղասպանության՝1915-1923թթ.) աջակցել մարդկանց, ովքեր վտանգելով իրենց կյանքը` կնպաստեն այնպիսի համաշխարհային նախագծերի իրագործմանը, որոնք կբարելավեն առավել կարիքավոր և աղքատ մարդկանց կյանքը: Սա իրագործվում է նախաձեռնության տարբեր ծրագրերի օգնությամբ՝ «Ավրորա» մրցանակ, Aurora Dialogues քննարկումների շարք, «Ավրորա» մարդասիրության ցուցիչ, Երախտագիտության նախագծեր եւ 100 LIVES ծրագիր: «Ավրորա» մարդասիրական նախաձեռնությունը Վարդան Գրեգորյանի, Նուբար Աֆեյանի և Ռուբեն Վարդանյանի մարդասիրական ձեռնարկումն է, որոնց արդեն միացել են ավելի քան 300 նոր աջակիցներ և գործընկերներ: Նախաձեռնությունն իր շուրջ է հրավիրում բոլորին, ովքեր ողջունում են նվիրվածությունը մեր համընդհանուր մարդկայնությանը:
«Ավրորա» մարդասիրական նախաձեռնությունը ներկայացված է երեք կազմակերպությունների կողմից՝ Aurora Humanitarian Initiative հիմնադրամ (Նյու Յորք, ԱՄՆ), 100 Lives հիմնադրամ (Ժնեւ, Շվեյցարիա) և IDeA հիմնադրամ (Երեւան Հայաստան):
«Ավրորա» համաշխարհային մարդասիրական մրցանակի մասին
«Ավրորա» համաշխարհային մարդասիրական մրցանակի նպատակն է մեծարել մերօրյա հերոսներին այն բացառիկ ազդեցության համար, որ նրանք իրենց գործողություններով ունեցել են մարդկային կյանքի պահպանման և մարդասիրությունն առաջ մղելու գործում։ Հայոց ցեղասպանությունը վերապրողների անունից՝ ի երախտագիտություն նրանց փրկողների, «Ավրորա» մրցանակի դափնեկրին ամեն տարի 2015-2023թթ. (ի հիշատակ ութ տարի տեւած Հայոց ցեղասպանության՝1915-1923թթ.) շնորհվում է 100.000 դոլար պարգև և բացառիկ հնարավորություն շարունակելու նվիրատվության շղթան՝ 1.000.000 դոլարի դրամաշնորհի առաջադրելով իրեն ոգեշնչած և գործի մղած կազմակերպություններին։
«Ավրորա» մրցանակի Ընտրող հանձնաժողովի կազմում ընդգրկված են Նոբելյան դափնեկիրներ Օսկար Արյասը, Շիրին Էբադին և Լեյմա Գբովեն, Իռլանդիայի նախկին նախագահ Մերի Ռոբինսոնը, մարդու իրավունքների ակտիվիստ Հինա Ջիլանին, Ավստրալիայի նախկին արտգործնախարար եւ Միջազգային ճգնաժամային խմբի նախագահ ու գործադիր տնօրեն Գարեթ Էվանսը, Մեքսիկայի նախկին նախագահ Էռնեստո Սեդիլյոն, «Բժիշկներ առանց սահմանների» կազմակերպության համահիմնադիր եւ Ֆրանսիայի նախկին արտգործնախարար Բեռնարդ Քուշները, ՄԱԿ-ում ԱՄՆ նախկին մշտական ներկայացուցիչ Սամանտա Փաուերը, Լոնդոնի կայսերական քոլեջի Գլոբալ առողջապահական նորարարությունների ինստիտուտի տնօրեն Լորդ Արա Դարզին, Նյու Յորքի Կարնեգի կորպորացիայի նախագահ Վարդան Գրեգորյանը և օսկարակիր դերասան ու մարդասեր Ջորջ Քլունին։–0–
