Սասուն Միքայելյան. Սյունիքում թուրքը կարող է ճանապարհից մարդ տանել, չեմ տեսել ո′չ հայ սահմանապահ, ո′չ ռուս (ՎԻԴԵՈ)

ԵՐԵՎԱՆ, 29 ապրիլի./Նովոստի–Արմենիա/. Վերջին պատերազմից հետո սահմաններին մեծ փոփոխություններ են եղել, հատկապես Սյունիքում, հիմա մինչև սահմանի վերականգնումը սահմանն ի՞նչ ձևով է ապահովվում, ասաց ԱԺ «Իմ քայլը» խմբակցության անդամ, ԵԿՄ նախագահ Սասուն Միքայելյանը ԱԺ Պաշտպանության և անվտանգության հարցերի մշտական հանձնաժողովի նիստում։

«Ես եղել եմ այնտեղ, ճանապարհը բաց ա, էն կողմը թուրքն ա, էս կողմը մենք ենք: Անհասկանալի իրավիճակ է: Այնտեղ ամեն պահի կարա թուրքը մարդ տանի ճանապարհից: Պիտի մի հատ տենց դեպք լինի, նոր մտածե՞նք», – հարցադրում արեց Միքայելյանը։

ԱԱԾ փոխտնօրեն Ստեփան Մելքոնյանն իր հերթին նշեց, որ Հայաստանի սահմանապահ զորքերի կողմից տեղադրված են ուղեկալներ և իրականացվում է ծառայություն, որի նպատակը հենց ազգաբնակչության անվտանգության ապահովումն է։

«Այս իրավիճակը բարդ է, դելիմիտացիա իրականացված չի: Հակառակորդի կողմից նույն իրավիճակն է, նրանց մոտ էլ դեռ օրենսդրական մասով կանոնակարգված չի: Այստեղ շատ դեպքերում հարցեր են ծագում, որ օպերատիվ միջամտություն է անհրաժեշտ և տեղում հարցերի կարգավորում, որն իրականացնում են մեր սահմանապահ զորքերը: Ամենաբարդը Գորիս-Կապան ճանապարհի այդ հատվածն է, որտեղ ճանապարհը մի քանի անգամ մտնում է ադրբեջանական տարածք: Այդտեղ նաև տեղակայված են ռուսական սահմանապահ զորքերի կողմից պոստեր, որտեղ  եթե ինչ–որ կոնֆլիկտային իրավիճակ է առաջանում, ռուս սահմանապահների մասնակցությամբ և ադրբեջանական կողմի հետ հանդիպումներ են լինում և կոնֆլիկտի լուծման հետ կապված տարբերակներ են քննարկվում», – ասաց Մելքոնյանը։

Միքայելյանը նշեց, որ վերջերս Սյունիքում երկու ժամ մնացել է ճանապարհին։

«Ո′չ մեր սահմանապահներին եմ տեսել, ոչ՝ ռուսական բանակի։ Մի մարդ չի մոտեցել: Թուրքերն էլ 100-150 մետր հեռավորության վրա էին: Էդ անվտանգությունը հիմա պետք ա իրականացվի, որովհետև 1993 թվականից եկած, օրինակ` Պառավաքարում, Տավուշում թուրքերն իջնում էին ճանապարհից մարդ էին տանում», – ասաց Սասուն Միքայելյանը:–0–