ԵՐԵՎԱՆ, 4 օգոստոսի./Նովոստի–Արմենիա/. Հայաստանում Ռուսաստանի արտակարգ և լիազոր դեսպան Սերգեյ Կոպիրկինը Հանրային հեռուստաընկերությանը տված հարցազրույցում մեկնաբանել է հայ-ադրբեջանական սահմանի երկայնքով ռուս սահմանապահների տեղակայման հնարավորությունը:
Ավելի վաղ ՀՀ վարչապետ Նիկոլ Փաշինյանը հայտարարել էր, որ Հայաստանը կքննարկի հայ-ադրբեջանական սահմանի ողջ երկայնքով ռուս սահմանապահների տեղակայման հնարավորությունը: Կրեմլը այդ հայտարարութունը չի մեկնաբանել:
«Նախ, ես կցանկանայի հիշեցնել,որ այդ գաղափարը մասամբ արդեն իրականացվել է Սյունիքի մարզում, որտեղ տեղակայված են ռուս սահմանապահներ հայ-ադրբեջանական սահմանի խնդրահարույց հատվածներում` ի լրումն ծառայության այն վայրերի, որոնք ավանդաբար հատկացվում էին ռուս սահմանապահներին: Ես հիշեցնեմ, որ դրանք Իրանի և Թուրքիայի հետ սահմաններն են»,-ասել է Կոպիրկինը:
Նա նշել է, որ այժմ Ռուսաստանից զգալի լրացուցիչ միջոցներ են ներգրավվել, այդ թվում՝ անձնակազմ, որպեսզի սահմանապահներին տեղակայեն այնպիսի խնդրահարույց շրջաններում, մասնավորապես, այնտեղ, որտեղ ճանապարհը երկու տարածքով է անցնում:
«Ես հունիսին այցելել եմ Սյունիքի մարզ և ռուս սահմանապահների ու հայ սահմանապահների սահմանային դիրքեր, զրուցել նրանց հետ, հասկացել եմ, թե որքան կարևոր է ռուս սահմանապահների, ռուսական դրոշի ներկայությունը, որպեսզի կայուն իրավիճակ պահպանվի, ինչ–որ արտառոց բան տեղի չունենա»,-ասել է Կոպիրկինը։
Նա նաև նշել է, որ դա իսկապես հաջողվում է անել։ Եթե առաջանում են ինչ–որ կենցաղային հարցեր, խնդիրներ, ռուս սահմանապահները միանում են դրանց կարգավորմանը։ Ռուս սահմանապահների ներկայությունը թույլ է տալիս տեղի բնակչությանը, որը հայտնվել է իր համար լիովին նոր և ողբերգական իրավիճակում, զգալ հարմարավետ, ավելի հանգիստ։
«Ես դրանում ինքս եմ համոզվել և կարծում եմ, որ սա մեր սահմանապահների շատ կարևոր առաքելությունն է։ Ինչ վերաբերում է մնացած խնդրահարույց հատվածներին, ապա կարող եմ միայն ասել, որ հարցը քննարկվում է` ռուսական կողմի ակտիվ մասնակցությամբ։ Մենք հասկանում ենք այս խնդրի կարևորությունը։ Ռուսական կողմը պատրաստ է ձեռնարկել համապատասխան քայլեր, բայց դա հարց է, որը պահանջում է քննարկում եռակոմղ ձևաչափով։ Նման աշխատանք տարվում է», – ասել է Կոպիրկինը։–0–