ԵՐԵՎԱՆ, 30 հուլիսի./Նովոստի–Արմենիա/. «Իմ քայլը» խմբակցության պատգամավոր Գայանե Աբրահամյանը, ով վարակվել է կորոնավիրուսով, գրառում է կատարել Facebook–յան իր էջում։
«Սիրելի ընկերներ, ես արդեն տանն եմ շարունակում կորոնավիրուսից անվերջ թվացող բուժումը, համեմատաբար լավ եմ, չնայած սարսափելի թուլությունն ու ցավերը դեռ հանգիստ չեն տալիս։ Չեմ պատկերացնում, թե հիմա ինչ վիճակում կլինեի, եթե Նորք Ինֆեկցիոն Կլինիկական հիվանդանոցի գերհոգատար ու պրոֆեսիոնալ բուժանձնակազմը արագ չգործեր և ոտքի չկանգնեցներ, անկեղծորեն չեմ էլ պատկերացնում, թե ինչ դժոխային ցավերի միջով են անցնում ծանր հիվանդները, երբ իմ վիճակը գնահատվում էր միջին ծանրության, բայց այդքանն էլ արդեն իսկ անտանելի էր», – գրել է Աբրահամյանը։
Նա նշել է, որ հիվանդանոցում ես միայն լիարժեքորեն հասկանում ու գնահատում բժիշկների նվիրումն ու անմնացորդ աշխատանքի ծավալը։
Загружается новость ... "Лево"
«Խոնարհվում եմ բոլոր բուժաշխատողների առաջ, որոնք գերհոգնած ու գերծանրաբեռնված այս օրերին շարունակում են նվիրված աշխատել, հոգատարությամբ ու ջերմությամբ բուժել ու սփոփել հիվանդներին, չնայած հենց իրենք, շատ-շատերից առավել, հոգածության կարիք ունեն։ Խորին երախտագիտությունս եմ հայտնում Նորք Ինֆեկցիոն Կլինիկական հիվանդանոցի տնօրեն Mher Davidyants -ին, 1–ին բաժանմունքի ղեկավար Arshak Ghazaryan -ին, այս ողջ ամիսներին իրականացված պրոֆեսիոնալ աշխատանքի եւև նվիրումի համար, երախտապարտ եմ ողջ բուժանձնակազմին կորոնավիրուսի ճիրաններից ինձ հնարավորինս անվնաս ազատելու եւ կյանք վերադարձնելու համար», – գրել է պատգամավորը։
Նա խնդրել է բոլորին զգույշ լինել։
«Երբեք չգիտեք, թե ինչ դրսևորումներ կունենա այս չարիքը ձեր օրգանիզմում, ես չունեի ոչ մի քրոնիկ հիվանդություն, բայց հետևանքներն անկանխատեսելի էին», – գրել է նա`ավելացնելով, որ մղձավանջային սարսափելի ցավերի մեջ գտնվող հիվանդների համար ամենատհաճ բանը, որ կարող է լինել հիվանդանոցի մոտակայքում` հրավառություններն են, համակեցության տարրական կանոնների ու մարդկային նվազագույն ապրումակցման բացակայության այս մթնոլորտն իսկապես անտանելի է ու ցավալի...։
Նա տեղեկացրել է, որ հրավառությունների մասով օրենսդրական փոփոխություններ է նախաձեռնել` շատ խիստ կարգավորումներով։
«Բայց մղձավանջը չէր ավարտվում միայն երեկոյան հրավառություններով, Նորք Ինֆեկցիոն հիվանդանոցի մոտակայքում ինչ-որ մեկը որոշել էր աքլոր պահել..., և կորոնավիրուսի ցավերից, անքնությունից ուժասպառ լուսադեմերը խաթարվում էին աքլորականչով, թվում է ծիծաղելի, բայց հավատացեք, երբ ցավերի մեջ ես ողջ գիշեր և լուսադեմին միայն մի փոքր կարողանում ես քնել` աքլորականչը դառնում է հերթական մղձավանջը...Մեր հասարակության ամենամեծ խնդիրներից մեկը հենց միմյանց նկատմամբ հոգածության պակասն է, բացառապես սեփական հարմարավետության ապահովումը` մյուսների հաշվին դարձել է «լավ տղա» լինելու չափանիշ, եսակենտրոնությունը ամենալուրջ խնդիրն է, որ ճգնաժամային այս իրավիճակներում ակնհայտ է դառնում։ Մենք նաև որպես հանրույթ առողջանալու ևւ վերափոխվելու կարիք ունենք։ Առողջ եղե'ք, պահպանե'ք կանոններն ու մի փոքր հոգացեք մյուսների մասին», – եզրափակել է պատգամավորը։–0–
