ԵՐԵՎԱՆ, 26 հունիսի. /Նովոստի–Արմենիա/. Կինոռեժիսոր, Հայաստանի ժողովրդական արտիստ Ռուբեն Գևորգյանցի ընտանիքը ՀՀ ՊՆ «Զինծառայողների կյանքին կամ առողջությանը պատճառված վնասների հատուցման» հիմնադրամ է(ՀՀ Կենտրոնական բանկ, 103008661003 հաշվեհամար, «Ռուբեն Գևորգյանցի հիշատակին» նշումով) փոխանցել հուղարկավորության կազմակերպման համար կառավարական հանձնաժողովի կողմից հատկացված 1 մլն 700 հազար դրամը։ Ինչպես հաղորդում է Panorama.am–ը, այս մասին տեղեկացրել են հանգուցյալի որդիները ` Վահե և Ստեփան Գևորգյանցները։
Կինոռեժիսորը մահացել է հունիսի 23-ին` 72 տարեկանում։ Ռ. Գևորգյանցի մահվան կապակցությամբ ստեղծվել էր հուղարկավորության կազմակերպման կառավարական հանձնաժողով: Հոգեհանգիստը կայացել է հունիս 25-ին Սբ. Հովհաննես եկեղեցում, հուղակարկավորությունն այսօր է` հունիսի 26-ին։ Որոշում է կայացվել Գևորգյանցին հուղարկավորել Երևանի քաղաքային պանթեոնում։
Ավելի վաղ Գևորգյանցի հարազատները հայտարարություն էին տարածել, ըստ որի՝ խնդրում են ծաղիկների և ծաղկեպսակների համար հատկացվող գումարը փոխանցել ՊՆ «Զինծառայողների կյանքին կամ առողջությանը պատճառված վնասների հատուցման» հիմնադրամին։ Այս կոչը լայնորեն տարածվեց սոցցանցերում և աջակցություն ստացավ հայ հասարակության կողմից։
Ռուբեն Գևորգյանցը ծնվել է 1945 թ.–ի նոյեմբերի 30–ին Երևանում։ 1968 թվականին ավարտել է Երևանի գեղարվեստա-թատերական ինստիտուտի Ռեժիսորական ֆակուլտետը (Վարդան Աճեմյանի արվեստանոցը)։ 1968թ.–ից աշխատել է վավերագրական ֆիլմերի կինոստուդիայում` որպես ռեժիսոր։ 1982-89 թթ.–ին եղել է «Հայֆիլմ» կինոստուդիայի վավերագրական ֆիլմերի ստեղծագործական միավորման գեղարվեստական ղեկավարը։ 1989 թվականից փաստավավերագրական ֆիլմերի «Հայկ» կինոստուդիայի տնօրենն ու գեղարվեստական ղեկավարն էր։ 2005-09թթ.–ին եղել է Հայաստանի Կինեմատոգրաֆիստների միության նախագահը։
1982թ.–ին արժանացել է «Հայաստանի արվեստի վաստակավոր գործիչ» կոչմանը, իսկ 2006թ.–ին` «ՀՀ ժողովրդական արտիստ» կոչմանը։
Դասավանդել է Երևանի արվեստի և կինոյի պետական համալսարանում։ Նա ավելի քան 60 ֆիլմերի հեղինակ է, որոնցից 6-ը` խաղարկային։ -0-
