ԵՐԵՎԱՆ, 23 մարտի./Նովոստի-Արմենիա/. Հետաքննող լրագրողների ասիոցիայի ինտերնետ հրատարակությունը (Hetq)
հրապարակել է Հայաստանի կաթնամթերքի շուկայում իրականացված հերթական հետաքննության արդյունքները: Այս անգամ փորձաքննության է ներկայացվել տեղական արտադրության թթվասերի 10 նմուշ։ Նմուշներից 4-ում հայտնաբերվել է խախտում, մասնավորապես՝ աղիքային ցուպիկ և խմորասնկերի բարձր քանակ։
Ինչպես է իրականացվել փորձաքննությունը
2023թ.-ի մարտի 2-ին Hetq-ը գնել է «Մարիաննա», «Թամարա», «Բիոկաթ», «Չանախ», «աշտարակ կաթ», «արզնի կաթ», «անի», «Մարիլա», «Բոնիլատ», «Yeremyan Products» (ապրանքանիշը՝ «Հայր և որդի Երեմյաններ») ապրանքանիշերի թթվասեր:
Նախքան լաբորատորիա հանձնելը, թթվասերները տարվել են Երևանի պետական համալսարանի Կենսաբանության ֆակուլտետ՝ մեկ նմուշ կույր համտեսի, մնացածը՝ դիմազերծման համար (թթվասերը լաբորատորիայում տեղափոխվել է ստերիլ տարայի մեջ, համարակալվել և ուղարկվել է փորձաքննության)։
Ջերմային ռեժիմը չխախտելու համար թթվասերները հենց գնման նույն օրը լաբորատորիա են տեղափոխվել հատուկ սառնարանով։ Փորձաքննությունն իրականացրել է «Ստանդարտ Դիալոգ» լաբորատորիան։
Փորձաքննության արդյունքները
Փորձաքննված 10 նմուշից 4-ը չի համապատասխանում սահմանված նորմերին։ Դրանք են՝ «Չանախ», «Արզնի կաթ», «Բիոկաթ» և «Բոնիլատ» ապրանքատեսակները։
Նմուշներից 3-ում հայտնաբերվել են աղիքային ցուպիկի խմբի մանրէներ. դրանք են՝ «Չանախ», «Բիոկաթ» և «Բոնիլատ» ապրանքանիշերի թթվասերները։
Նմուշներից մեկում՝ «Արզնի Կաթ» թթվասերի մեջ, հայտնաբերվել է խմորասնկերի` թույլատրելիից 7 անգամ բարձր քանակ։
Նմուշներից 5-ն ունեն մակնշման խախտումներ. դրանք են՝ «Marila», «Ani», «Bonilat» և «Yeremyan products» թթվասերները. ապրանքների անվանումն անգլերեն է՝ պահանջված հայերենի և ռուսերենի փոխարեն։
Ավելի վաղ «Հետք»-ի աղմկահարույց հոդվածում նշվել էր, որ լաբորատոր փորձաքննության արդյունքներով՝ «Թամարա», «Մարիաննա», «Բիոկաթ», «Չանախ», «Աշտարակ կաթ», «Արզնի կաթ», «Անի», «Մարիլա», «Բոնիլատ», «Հայր և որդի Երեմյան» 10 ապրանքանիշերի կաթնաշոռի նմուշներից միայն երկուսն են համապատասխանում սահմանված նորմերին, դրանք են «Թամարա» և «Անի» ապրանքանիշերը: Մնացածում հայտնաբերվել են աղիքային ցուպիկի բակտերիաներ, անթույլատրելի քանակության խմորասնկեր և բորբոսասնկեր։-0-
