ԵՐԵՎԱՆ, 15 հոկտեմբերի./Նովոստի–Արմենիա/. Երևանի նորընտիր քաղաքապետ Հայկ Մարությանը, ում երդմնակալությունը տեղի է ունեցել շաբաթ օրը` հոկտեմբերի 13–ին, առաջարկում է «կարմիր գծերի» հարցը լուծել հանրաքվեի միջոցով։
«Կարմիր գծերի մասով ճիշտ կլինի հանրաքվեի միջոցով երևանցիները որոշեն թե ինչ լուծում է պետք տալ», – գրել է Մարությանը` Facebook–յան պաշտոնական էջում պատասխանելով օգտատերերից մեկի հարցին։
Загружается новость ... "Лево"
Այսօրվա դրությամբ գործող սակագների համաձայն, Երևանում այսպես կոչված «կարմիր գծերում» 1 ժամ կայանելու համար ավտոսեփակատերերը վճարում են 100 դրամ, մեկ օրվա համար` 500 դրամ, մեկ ամսվա համար` 1000 դրամ, իսկ տարեկան` 12 հազար դրամ։
Հայ վարորդների կողմից մշտական քննարկման առարկա է դարձել «կարմիր գծերի» նպատակահարմարության, դրանց դիմաց վճարի հիմնավորման հարցը։ Երևանի նախկին իշխանությունների հասցեին բազմիցս հնչել են մեղադրանքներ միջոցները ոչ նպատակային ծախսելու համար։
Հիշեցնենք, որ սա հանրային հնչեղություն ունեցող արդեն երկրորդ հարցն է, որը Մարությանն առաջարկում է լուծել հանրաքվեի միջոցով։ Շաբաթ օրը նա առաջարկել է հանրաքվեի միջոցով լուծել հասարակական տրանսպորտի ուղեվարձի բարձրացման հարցը։–0–