ԵՐԵՎԱՆ, 19 փետրվարի. /Նովոստի-Արմենիա/. Ռուսական ռազմաօդային ուժերի Իլ-76 ինքնաթիռը նախօրեին Հայաստանից Սիրիա է տեղափոխել շաբաթվա մեջ արդեն երկրորդ մարդասիրական օգնությունը, հաղորդում է ՀՀ ԱԻՆ մամուլի ծառայությունը:
«Շուրջ 20 տոննա մարդասիրական օգնությունը տեղափոխող ինքնաթիռը վայրէջք է կատարելու անմիջապես Սիրիայի Լաթակիա քաղաքում, այնուհետև, օգնության մի մասը` նախորդ խմբաքանակի որոշ մասի հետ միասին, ռուսական զինվորական պահակախմբի ուղեկցությամբ կտեղափոխվի Հալեպ», - լրագրողներին ասաց ՀՀ ԱԻ նախարար Դ. Տոնոյանը:
Ռազմական հակամարտությունից տուժածներին արդյունքում բաժավելու են սննդամթերք, պարենային իրեր, հագուստ և քնապարկեր:
Հայաստանում «Էրեբունի» օդանավակայանում ինքնաթիռը ճանապարհեցին ՀՀ արտակարգ իրավիճակների նախարար Դավիթ Տոնոյանը, Սփյուռքի նախարար Հրանուշ Հակոբյանը և ՀՀ-ում ՌԴ դեսպանության ռազմական կցորդ, գեներալ-մայոր Եվգենի Բուլավինցևը:
Հայաստանից ուղարկված մարդասիրական օգնությունը հավասարաչափ բաժանվելու է բոլոր կարիքավորներին:
Ավելի վաղ՝ փետրվարի 14-ին, ՀՀ նախագահի հանձնարարությամբ, Հայաստանից նույն ինքնաթիռով Սիրիա էր տեղփոխվել այս տարվա առաջին մարդասիրական օգնությունը:
Սա Հայաստանից Սիրիա ուղարկած մարդասիրական օգնության արդեն չորրորդ օդանավն է։ Նախորդ տարի ռուսական երկու ինքնաթիռներ այդ երկիր են տեղափոխել 40 տոննա պարենամթերք։ Առաջիկայում նախատեսվում է ուղարկել ևս 17 տոննա մարդասիրական օգնություն` հագուստ, վերմակներ և քնապարկեր։
Սիրիահայ համայնքը մինչև այդ երկրում հակամարտության սկսվելը մոտ 110 հազար մարդ էր ներառում։ Սիրիահայերը հիմնականում ապրում էին Հալեպում, Դամասկոսում, Լաթաքիայում, Քեսաբում և Էլ Քամըշլիում։ Պատերազմից հետո ավելի քան 90 հազար հայ լքեց երկիրը։ -0-
