ԵՐԵՎԱՆ, 5 հոկտեմբերի. /Նովոստի–Արմենիա/. ՀՀ ԱԻՆ–ը տեղեկություն է հաղորդում այսօր գիշերը Նիժնի Նովգորոդ-Երևան երթուղին սպասարկող միկրոավտոբուսի վթարից տուժածների առողջական վիճակի մասին։
Հիշեցնենք, որ հոկտեմբերի 5-ին ժամը 01:55-ին տեղեկություն է ստացվել, որ Միներալնիե Վոդի-Ալեկսանդրովսկոյե ավտոճանապարհի 8-րդ կմ-ին տեղի է ունեցել ՃՏՊ: «Mercedes Sprinter» ARM 35 AS 530 պետհամարանիշով ավտոմեքենան (վարորդ՝ 1954 թ. ծնված Ումրշատ Իսկոյան) դուրս է եկել ավտոճանապարհից և հայտնվել առվակում: Ավտովթարի ժամանակ մեքենայում գտնվել է 16 մարդ, որոնցից մեկը՝ երեխա, զոհեր չկան։
«Հոկտեմբերի 5-ին, ժամը 10:18-ին կապ է հաստատվել ՌԴ Միներալնիե Վոդի քաղաքի կենտրոնական հիվանդանոցի հերթապահ բժշկի հետ, ով տեղեկացրեց, որ Միներալնիե Վոդի-Ալեքսանդրովսկոյե ավտոճանապարհի 8-րդ կմ-ին տեղի ունեցած ՃՏՊ-ից իրենց մոտ հոսպիտալացված Գոհար Հակոբյանի առողջական վիճակը բժիշկները գնահատել են բավարար, իսկ Սալվի Ավետիսյանը, ստանալով համապատասխան բուժօգնություն, դուրս է գրվել», – նշվում է գերատեսչության հաղորդագրության մեջ։–0–