38–ամյա Նելլին, զբաղեցնելով Եղեգնաձորի բանկերից մեկի ղեկավարի պաշտոնը, յուրացրել է շուրջ 43մլն դրամ. կինը կալանավորվել է (ՎԻԴԵՈ)
18:55
15 Հունվարի 2019
ԵՐԵՎԱՆ, 15 հունվարի./Նովոստի–Արմենիա/. 38–ամյա Նելլի Հարությունյանը, զբաղեցնելով Եղեգնաձորում գործող բանկերից մեկի ղեկավարի պաշտոնը, յուրացրել է 42.316.000 դրամ։
Ինչպես հաղորդում է ՀՀ ոստիկանության մամուլի ծառայությունը, հունվարի 13-ին ոստիկանության Եղեգնաձորի բաժնի ծառայողները Բագրատաշենի սահմանային անցակետում հայտնաբերել ու բաժին բերման են ենթարկել 2017 թվականի հունիսից առանձնապես խոշոր չափերով յուրացում կամ վատնում կատարելու մեղադրանքով հետախուզվող Նելլի Հարությունյանին։
«Նախնական տվյալներով՝ 38-ամյա Հարությունյանը, զբաղեցնելով Եղեգնաձորում գործող բանկերից մեկի ղեկավարի պաշտոնը, 2016-ի հունիսից մինչև 2017-ի հունիս բանկոմատի լիցքավորման և լիցքաթափման գործընթացներն իրականացնելիս մաս-մաս յուրացրել է 42.316.000 դրամ։ Նրա նկատմամբ խափանման միջոց էր ընտրվել կալանավորումը», – նշվում է գերատեսչության հաղորդագրության մեջ։
Վայոց Ձորի մարզի Գետափ գյուղի բնակիչ Նելլի Հարությունյանին ոստիկանները ներակայացրել են դեպքի նախաքննությունը վարող քննչական բաժին՝ հարցաքննության։ Հանգամանքները պարզվում են։–0–