Յուրա Մովսիսյանը հասկանում է, որ իր ծառայությունները կարող են պետք չգալ «Սպարտակին»

ԵՐԵՎԱՆ, 6 հոկտեմբերի. /Նովոստի-Արմենիա/. «Սպարտակ» ակումբի հարձակվող Յուրա Մովսիսյանը, ով վարձակալության իրավունքներով հանդես է գալիս «Ռեալ Սոլթ Լեյք» ամերիկյան ակումբում, հասկանում է, որ իր ծառայությունները կարող են պետք չգալ մոսկովյան ակումբին, հայտարարել է ֆուտբոլիստի գործակալ Պատրիկ Մաքքեյբը:

Մովսիսյանը տեղափոխվել է «Սպարտակ» 2013 թ.-ին: 2016 թ.-ի հունվարին նրան վարձակալել է Ֆուտբոլի գլխավոր լիգայի (ԱՄՆ և Կանադայի ֆուտբոլային լիգաների համակարգի բարձրագույն դիզիվիոն) «Ռեալ Սոլթ Լեյքի» կողմից: Վարձակալության համաձայնագիրը նախատեսված է մինչև 2016 թվականի դեկտեմբերի 1–ը։ Ամերիկյան ակումբը, որի կազմում Մովսիսյանը հանդես է եկել 2007-2009 թթ.-ին, ունի 29-ամյա հայ ֆուտբոլիստին գնելու առաջնահերթ իրավունք:

«Կարծում եմ, որ տվյալ պահին մեզ համար լավագույն ելքը կլինի սպասել, թե ինչ կլինի հետագայում: Մենք հասկանում ենք, որ «Սպարտակն» այժմ լավ է հանդես գալիս Ռուսաստանի առաջնությունում, ակնհայտ է, որ նրանց մոտ ամեն ինչ ստացվում է նաև առանց Յուրայի: Մենք նաև հասկանում ենք, որ նման պարագայում նրանց կարող են պետք չգալ մեր ծառայությունները», - հեռախոսազրույցի ժամանակ ասաց Մաքքեյբը «Ռ-սպորտ» գործակալությանը:

«Անկեղծ ասած, այս պահին մենք գաղափար չունենք` ինչ անել հետագայում: Նախևառաջ, մենք պետք է բանակցություններ վարենք «Ռեալ Սոլթ Լեյքի» և «Սպարտակի» հետ: Մեր վերջին բանակցությունները մոսկովյան ակումբի հետ բավական վաղուց էին, ուստի մենք արդեն վաղուց տեղյակ չենք նրանց մտադրություններից», - ավելացրել է գործակալը: -0-