Երևանում մեկնարկել են Համահայկական վեցերորդ խաղերը

ԵՐԵՎԱՆ, 3 օգոստոսի. /Նովոստի–Արմենիա/. Երևանում կիրակի մեկնարկեցին Համահայկական վեցերորդ խաղերը։

Բացման արարողությանը ներկա էր ՀՀ նախագահ Սերժ Սարգսյանը։ Համահայկական վեցերորդ խաղերն անցկացվեցին Վազգեն Սարգսյանի անվան Հանրապետական մարզադաշտում։ Գունեղ թատերականացված շոուից հետո սկսվեց մասնակիցների քայլերթը, որը բացեց Արցախի պատվիրակությունը, որին հետևեցին հայազգի մարզիկներ Ռուսաստանի, Իրանի, ԱՄՆ–ի, Արգենտինայի, Իսպանիայի, Բուլղարիայի, Գերմանիայի, Իտալիայի, Բելառուսի և մնացած մասնակից երկրների քաղաքներից, ինչպես նաև Հայաստանի մարզերից։ Երևանի պատվիրակության կազմում ներառվել են սահմանափակ կարողություններով մարդիկ։

Արևմտյան Հայաստանի ներկայացուցիչների հետ միասին Հայաստան է ժամանել թուրքահայ հայտնի երգչուհի Սիբիլ Բեկտորօղլուն։

Մասնակիցներին ողջույնի խոսք է հղել ՌԴ սպորտի նախարար Վալերի Մուտկոն։

Համահայկական խաղերի կրակը վառեց լեգենդար մարմնամարզիկ, եռակի օլիմպիական չեմպիոն, աշխարհի քառակի չեմպիոն Ալբերտ Ազարյանը, ինչից հետո ՀՀ նախագահ Սեժր Սարգսյանը հայտարարեց խաղերի բացման մասին։

Համահայկական խաղերը կտևեն մինչև օգոստոսի 13–ը։ Խաղերին մասնակցում են աշխարհի 35 երկրները ներկայացնող ավելի քան 6 հազար հայ մարզիկներ։ Խաղերի մասնակիցները կպայքարեն 17 մարզաձևերում (յոթով ավել, քան նախորդ խաղերի ժամանակ), որոնց թվում են ֆուտբոլը, բասկետբոլը, վոլեյբոլը, ֆուտզալը, թենիսը, սեղանի թենիսը, շախմատը, բադմինտոնը, լողը, թեթև ատլետիկան։

Համահայկական առաջին ամառային խաղերն անցկացվել են Հայաստանում 1999 թ.–ին, որոնց մասնակցել են 23 երկրներ ներկայացնող մարզիկներ, երկրորդ խաղերն անցկացվել են 2001 թ.–ին, երրորդը` 2003 թ.–ին, չորրորդը` 2007 թ.–ին հինգերորդը` 2011 թ.–ին։

Ձմեռային առաջին համահայկական խաղերն անցկացվել են Ծաղկաձորում 2014 թ.–ի փետրվարի 24–ից մարտի 2–ը։ Խաղերին մասնակցել են աշխարհի 11 երկրների 22 քաղաքները ներկայացնող մոտ 400 մարզիկներ։ Խաղարկվել են 13 կոմպլեկտ մեդալներ դահուկավազքում, լեռնադահուկային մարզաձևում, սնոուբորդում, խաղարկվել է նաև Հոկեյի գավաթը։ –0–