ԵՐԵՎԱՆ, 15 հոկտեմբերի. /Նովոստի–Արմենիա/. Երևանի Խ.Աբովյանի անվան պետական մանկավարժական համալսարանում հոկտեմբերի 16-18–ը «Շախմատը դպրոցներում» խորագրով միջազգային համաժողով կանցկացվի, չորեքշաբթի հայտնեց Հայաստանի շախմատի ֆեդերացիայի փոխնախագահ Սմբատ Լպուտյանը։
Միջոցառումը կազմակերպել են Կրթության և գիտության նախարարությունը, Հայաստանի շախմատի ֆեդերացիան և Շախմատի ակադեմիան` Հայաստանի պետական մանկավարժական համալսարանի հետ համատեղ։
«Համաժողովին կմասնակցեն 31 երկրի ներկայացուցիչներ»,– ասաց Լպուտյանը։
Ըստ նրա, համաժողովի շրջանակում կքննարկվեն «Շախմատը դպրոցներում» ծրագրի նախապատրաստական և կազմակերպչական աշխատանքների, մեթոդական ուղղությունների, դպրոցներում գիտական հետազոտությունների, շախմատային ուսումնահետազոտական լաբորատորիայի, հայկական դպրոցներում սոցիոլոգիական հետազոտությունների, դասախոսների պատրաստման և վերապատրաստման, երեխաների և ուսուցիչների հեռահար ուսուցման հետ կապված հարցեր։
Ինչպես նշեց Լպուտյանը, Հայաստանն առաջին երկիրն է, որտեղ շախմատը դասավանդվում է դպրոցներում որպես առանձին առարկա։ «Բոլորին շատ է հետաքրքրում այն հարցը, թե ինչ են տվել աշակերտներին շախմատի դասերը և ինչպես են ազդել նրանց մտածելակերպի վրա, և արդյոք դա Հայաստանի համար կարևոր քայլ էր»,– ընդգծեց Շախմատի ֆեդերացիայի փոխտնօրենը։
Հայաստանի կրթության և գիտության նախարար Արմեն Աշոտյանի խոսքով` դպրոցներում շախմատի դասերը բարձրացնում են տրամաբանական մտածողության մակարդակը, առաջնորդի հատկություններ և ռազմավարական մտածողություն զարգացնում, օգնում են ավելի արագ որոշումներ կայացնել։ «Մենք միշտ սովոր ենք եղել օրինակ վերցնել այլ երկրներից, ներդնել հայկական կրթական համակարգում այս կամ այն նորույթը, բայց շախմատը կրթական համակարգում այն է, ինչ Հայաստանը կարող է դուրս բերել որպես կրթական գաղափարախոսություն»,– նշեց Աշոտյանը` ավելացնելով, որ ցանկացած դպրոցական, ով հետագայում կցանկանա դպրոցից դուրս զբաղվել շախմատով, կընձեռվի այդ հնարավորությունը։
«Համաժողովը մասնակիցներին փորձի փոխանակման հնարավորություն կտա, ինչը հետագայում կօգնի շախմատի զարգացմանը և կընդգծի դրա կարևորությունը կրթական համակարգում»,– նշեց գերատեսչության ղեկավարը։ -0-
