ԵՐԵՎԱՆ, 7 հոկտեմբերի. /Նովոստի-Արմենիա/. ՎՏԲ Հայաստան Բանկը դարձել է «Շիրակ» ֆուտբոլային ակումբի հովանավորը, հաղորդում է բանկի մամուլի ծառայությունը:
Հաղորդագրության համաձայն` հոկտեմբերի 8-ին Գյումրիում տեղի կունենա ընկերական հանդիպում բանկի թիմի և «Շիրակ» ֆուտբոլային ակումբի միջև: Խաղի ընթացքում նախատեսվում է ՎՏԲ-Հայաստան Բանկի Գլխավոր տնօրեն-Տնօրինության նախագահ Յուրի Գուսևի և ակումբի սեփականատեր Արման Սահակյանի հարցազրույցը:
«Շիրակը» Գյումրի քաղաքի ֆուտբոլային ակումբն է: Հիմնադրվել է 1958թ.-ին: Այն Հայաստանի ամենահին ակումբներից է և մասնակցել է ՀՀ ֆուտբոլի Բարձրագույն խմբի բոլոր առաջնություններին: «Շիրակը» Հայաստանի քառակի չեմպիոն է (1992, 1994, 1999, 2012/2013), Հայաստանի գավաթակիր (2011/12), Հայաստանի սուպերգավաթի քառակի հաղթող (1996, 1999, 2003, 2013): 2010 թվականից ակումբի սեփականատերն է «Sovrano» ընկերությունների խմբի սեփականատեր Արման Սահակյանը:
«ՎՏԲ-Հայաստան Բանկ» ՓԲԸ–ն ՎՏԲ միջազգային ֆինանսական խմբի մասնակից է դարձել 2004թ. ապրիլին: «ՎՏԲ Բանկ» ԲԲԸ–ն «ՎՏԲ-Հայաստան Բանկ» ՓԲԸ–ի 100% բաժնետոմսերի փաթեթի միանձնյա բաժնետերն է։ Բանկը հիմնական ցուցանիշների մի ամբողջ շարքով մշտապես ներառվում է ՀՀ բանկային համակարգի առաջատարների թվի մեջ: Ներկա դրությամբ բանկն ունի ամենալայն մասնաճյուղային ցանցը ողջ երկրում` 67 մասնաճյուղ:
Բանկի ակտիվները 2014 թ.-ի հուլիսի 1-ի դրությամբ կազմել են 312,5 մլրդ դրամ, պարտավորությունները՝ 268,5 մլրդ դրամ, վարկային ներդրումները՝ 230,3 մլրդ դրամ, իսկ կապիտալը՝ մոտ 44 մլրդ դրամ ($1 – 408,48 դրամ):-0-
