ԵՐԵՎԱՆ, 20 օգոստոսի. /Նովոստի–Արմենիա/. ՖԻՖԱ–ի վերաքննիչ կոմիտեն մերժել է «Բարսելոնայի» բողոքարկումը. իսպանական ակումբը չի կարող նոր ֆուտբոլիստներ գնել` սկսած 2015 թվականի հունվարից, հաղորդում է ՌԻԱ Նովոստին` վկայակոչելով ՖԻՖԱ–ի պաշտոնական կայքին։
ՖԻՖԱ–ն ապրիլի 2–ին հայտնել էր, որ «Բարսելոնային» արգելվել է նոր ֆուտբոլիստներ գրանցել տրանսֆերային երկու ժամանակահատվածների ընթացքում։ Նախորդ տարվա ընթացքում տարվող հետաքննությունը խախտումներ է բացահայտել կատալոնական ակումբի և Իսպանիայի ֆուտբոլի ֆեդերացիայի (RFEF) միջազգային տրանսֆերների և անչափահաս խաղացողների իրավական գրանցման գործունեությունում։
Մամուլի ասուլիսի ընթացքում ակումբի նախագահ Հոսեփ Բարտոմեուն հայտնել է, որ օգոստոսի 19–ին ակումբը ՖԻՖԱ–ի անդամներին կներկայացնի պատժի կապակցությամբ իր դիրքորոշումը։ ՖԻՖԱ–ի վերաքննիչ կոմիտեի նախագահ Լարի Մուսենդսենը, քննելով գործի հանգամանքները, որոշում է ընդունել, որ ֆուտբոլիստների գրանցման արգելքն ուժի մեջ չի մտնի վերաքննիչ կոմիտեի որոշումից շուտ։ Այսպիսով, «Բարսելոնան» կարող էր նոր խաղացողների գրանցել մինչև ՖԻՖԱ–ի վերջնական որոշումը։
Չորեքշաբթի ՖԻՖԱ–ն հայտարարել է, որ կատալոնացիների և RFEF–ի բողոքարկումը մերժվել է։ Այս որոշումը նշանակում է, որ «Բարսելոնան» չի կարող նոր ֆուտբոլիստներ գրանցել տրանսֆերային երկու` ձմեռային և ամառային ժամանակահատվածներում` սկսած 2015 թվականի հունվարից։ Ակումբը նաև 450 շվեյցարական ֆրանկ տուգանք կվճարի և 90 օրվա ընթացքում պետք է վերացնի բոլոր խախտումները։ RFEF–ը տուգանվել է 500 հազար շվեյցարական ֆրանկի չափով, և մեկ տարում պետք է կարգի բերի անչափահաս ֆուտբոլիստների միջազգային կարգավորման նորմատիվ բազան։ -0-
