Լյովը հաստատել է, որ Գերմանիայի ֆուտբոլի հավաքականի հետ աշխատանքը կշարունակի մինչև Եվրո–2016–ը

ԵՐԵՎԱՆ, 23 հուլիսի. /Նովոստի–Արմենիա/. Գերմանիայի ֆուտբոլի հավաքականի գլխավոր մարզիչ Յոաքիմ Լյովը հայտարարել է, որ կմնա իր պաշտոնում մինչև 2016 թվականին Ֆրանսիայում կայանալիք Եվրոպայի առաջնությունը, հաղորդում է ՌԻԱ Նովոստին։

Լյովի պայմանագիրը Գերմանական ֆուտբոլային միության (DFB) հետ, որը ստորագրված է մինչև 2016 թվականը, ստորագրվել է դեռ նախորդ տարվա վերջին։ Մարզիչի խոսքով` կողմերը հավաքվել են Բրազիլիայի աշխարհի առաջնությունից հետո և որոշել են չլուծարել համաձայնագիրը։

«Այս պահին ես չեմ կարող ավելի լավ բան պատկերացնել, քան հավաքականի հետ աշխատանքը շարունակելն է, որպեսզի այն Եվրոպայի առաջնություն դուրս գա։ Մենք Բրազիլիայում մեծ հաջողություն ունեցանք, բայց դեռ ունենք նպատակներ, որոնց ցանկանում ենք հասնել»,– Լյովի խոսքն է մեջբերում DFB–ի պաշտոնական կայքը։

Լյովը Գերմանիայի հավաքականը գլխավորել է 2006 թվականին` պաշտոնում փոխարինելով մարզիչ Յուրգեն Կլինսմանին։ 54–ամյա մասնագետի ղեկավարությամբ թիմը բրոնզ է նվաճել 2006 և 2010 թվականների աշխարհի առաջնություններում և դարձել է Բրազիլիայի աշխարհի առաջնության հաղթող։ Նրա գլխավորությամբ Գերմանիայի հավաքականը նաև արծաթե և բրոնզե պարգևների է արժանացել Եվրոպայի առաջնություններում։ -0-