Հայ գրոսմայստեր Լևոն Արոնյանը կմասնակցի աշխարհի վեցերորդ չեմպիոն Միխայիլ Բոտվինիկի հիշատակին նվիրված շախմատային միջազգային մրցաշարին, որը կանցկացվի սեպտեմբերի 2-5-ը Մոսկվայում։
Ըստ միջազգային գրոսմայստեր Եվգենի Բարեևի՝ մրցաշարը մասնակիցների այնքան աստղային կազմ է հավաքել, որ դժվար է ֆավորիտներին նշել։
Արագ շախմատի մրցաշարում կպայքարեն համաշխարհային վարկանիշի առաջնորդ Մագնուս Կառլսենը (Նորվեգիա, 2821), աշխարհի չեմպիոն Վիշվանաթան Անանդը (Հնդկաստան, 2817), Լևոն Արոնյանը (Հայաստան, 2805) և աշխարհի նախկին չեմպիոն Վլադիմիր Կրամնիկը (Ռուսաստան, 2781)։
Կանանց մրցաշարում աշխարհի չեմպիոնի կոչման համար կխաղան հնդկուհի Խումպի Կոներուն (2614), ռուս Տատյանա Կոսինցևան (2557), Եվրոպայի չեմպիոնուհի Լիտվայից Վիկտորիա Չմիլիտեն (2528) և Հայաստանի ներկայացուցչուհի Էլինա Դանիելյանը (2521)։
«Մրցաշարի արդյունքը կանխատեսելը և Բոտվինիկի հուշամրցաշարի ֆավորիտին նշելը պարզապես անհնար է»,- «Р-Սպորտին» հեռախոսով ասել է Բարեևը։ -Ինչպե՞ս կարելի է մրցակցության ֆավորիտին նշել, երբ շախմատային սեղանի շուրջ շախմատի չորս Աստվածներ են նստելու»։
Գործակալության զրուցակիցն ավելացրել է, որ մրցակցության վերջնական արդյունքը կորոշվի կախված նրանից, թե «ով լավագույն ձևով կմոտենա մրցաշարին և ով ավելի շատ կցանկանա հաղթանակ տանել»։
«Իսկ եթե խոսենք կանանց մրցաշարի մասին, ապա ինձ թվում է հաղթանակի առավել մեծ հնարավորություններ ունեն Խամպի Կոներուն և Վիկտորիա Չմիլիտեն»,- ամփոփել է գրոսմայստերը։ -0-
