Աբրամովիչի ներկայացուցիչը հերքել է հոլանդական ֆուտբոլային ակումբ գնելու վերաբերյալ տեղեկատվությունը
Millhouse Capital ընկերությունը, որը կառավարում է Ռոման Աբրամովիչի ակտիվները, հերքում է բիզնեսմենի՝ NEC հոլանդական ֆուտբոլային ակումբը գնելու մտադրության մասին տեղեկատվությունը, հաղորդում է ՌԻԱ Նովոստին:
Այն մասին, որ Ռուսաստանցի միլիարդատեր Ռոման Աբրամովիչը մտադիր է գնել բարձրագույն լիգայում մասնակցող NEC հոլանդական ֆուտբոլային ակումբը, հինգշաբթի գրել է Postimees էստոնական թերթը: Ըստ թերթի, բանակցությունների միջնորդն է Էստոնիայի ֆուտբոլային միության նախագահ Այվար Պոխլակը:
«Դա անհեթեթություն է: Այս տեղեկատվությունը չի համապատասխանում իրականությանը»,- ՌԻԱ Նովոստիին է հայտնել Millhouse տեղեկատվական քաղաքականության վարչության պետ Ջոն Մանը:
NEC (Nijmegen Eendracht Combinatie) հոլանդական ակումբը ներկայացնում է Նեյմեգեն քաղաքը: Մինչև հիմա թիմը չի նվաճել երկրի չեմպիոնի տիտղոսը և չի հաղթել Հոլանդիայի գավաթի խաղերում: Նախորդ սեզոնն ակումբն ավարտել է՝ զբաղեցնելով համեստ 13-րդ տեղը: Այս թիմում է խաղացել նախկին ֆուտբոլիստ, մարզիչ Գուս Հիդինգը: -0-