Կասպարովը հաղթել է Կարպովին

ԵՐԵՎԱՆ, 25 սեպտեմբերի. /Նովոստի-Արմենիա/. 9:3 հաշվով Կասպարովի հաղթանակով ավարտվել է աշխարհի նախկին չեմպիոններ Անատոլի Կարպովի և Գարի Կասպարովի միջև եռօրյա գերմրցաշարը, հաղորդում է «ՌԻԱ Նովոստին»:

Սեպտեմբերի 22-ից 24-ը գրոսմայստերները Իսպանիայի Վալենսիայում անցկացրել են արագ շախմատի չորս հանդիպում՝ 25 րոպե + հինգ վայրկյան ժամանակով և ութ բլից-հանդիպում՝ յուրաքանչյուրը հինգ րոպե + երկու վայրկյան ժամանակով:

Երեքշաբթի և չորեքշաբթի տեղի ունեցած արագ շախմատի չորս հանդիպումներում 3:1 հաշվով առաջատարի դիրքում էր Կասպարովը:

Հինգշաբթի տեղի ունեցած ութ բլից-հանդիպումներում հաղթանակը ևս Կասպարովինն էր:

Հինգշաբթի առաջին երկու բլից-հանդիպումներն անցկացվեցին սրընթաց և Կարպովի ակնհայտ առավելությամբ: Առաջին հանդիպման ժամանակ Կասպարովը հանձնվեց խաղի վերջին վայրկյաններին, իսկ երկրորդի ժամանակ, չվատնելով իր ժամանակի նույնիսկ կեսը, նա Կարպովին ոչ-ոքի առաջարկեց:

Երրորդ հանդիպման ժամանակ Կասպարովը ուժերն հավաքեց և իր խաղով ստիպեց Կարպովին հանդիպման վերջին, հաշված րոպեներին ճանաչել սեփական պարտությունը: Բլից-հանդիպումներում հաշիվը հավասարվեց՝ 1,5:1,5:

Հինգշաբթի օրվա խաղը բլից-հանդիպումների շարքում առաջինն էր, երբ մրցակիցներից մեկը (Կարպովը) զիջեց ցայտնոտի պատճառով: Հանդիպման դադարի պահին Կասպարովը խաղի համար դեռևս հինգ վայրկյան ուներ:

Կեսժամանոց ընդմիջումից հետո (յուրաքանչյուր բլից-հանդիպումից հետո մրցակիցները հանգստանում էին տասը րոպե, չորրորդից հետո՝ կես ժամ) գրոսմայստերներն ավելի հանգիստ և ոչ այդքան համառ էին թվում: Սակայն երբ ժամանակը սրընթաց առաջ էր շարժվում, հանդիպումների տեմպը ևս աագանում էր: Այս հանդիպման համար նախատեսված ժամանակի ավարտից մեկ վայրկյան առաջ Կարպովը հեռացավ սրահից՝ այսկերպ ճանաչելով սեփական պարտությունը:

Հինգերորդ հանդիպումից հետո հաշիվը դարձավ 3,5:1,5՝ հօգուտ Կասպարովի, գերմրցաշարի ընդհանուր հաշիվն է 6,5:2,5՝ հօգուտ Կասպարովը: Այսպիսով, միավորների տեսակետից խաղն անիմաստ էր դառնում. մնացած երեք բլից-հանդիպումների ցանկացած արդյունքի դեպքում գերմրցաշարի ընդհանուր հաշիվը, այնուամենայնիվ, կլիներ հօգուտ Կասպարովի:

Վեցերորդ հանդիպման ժամանակ Կասպարովի 26-րդ պատասխան քայլից հետո սպիտակ խաղաքարերով խաղացող Կարպովը կրկին հանձնվեց:

Յոթերորդ հանդիպման ժամանակ շախմատիստները կատարեցին 95-ական քայլ, որից հետո Կարպովին մնաց ընդամենը երկու, իսկ Կասպարովին չորս խաղաքարեր: 96-րդ քայլին Կարպովը կրկին վերջին վայրկյաններին ճանաչեց սեփական պարտությունը:

Բլից-հանդիպման և գերմրցաշարի վերջին՝ ութերորդ հանդիպումն ավարտվեց ոչ-ոքի: Ընդ որում Կարպովը քայլ կատարելու համար ուներ 56 վայրկյան, Կասպարովը՝ 1 րոպե 34 վայրկյան ժամանակ:

Հանդիպման մեկնաբանների կարծիքով, վերջին մի քանի հանդիպումների ժամանակ Կարպովը բավականին ագրեսիվ էր, սակայն, այնուամենայնիվ, չէր հասնում այն խաղի մակարդակին, որը ցուցադրում էր Կասպարովը՝ խաղալով մեթոդաբանորեն և ճնշումով:

Գերմրցաշարի վերջին օրն իրարանցում էր առաջացրել ոչ միայն լրագրողների շրջանում. մամուլի կենտրոնում լրագրողների թիվը երկու անգամ ավել էր նախորդ երկու օրերի համեմատ: Իրարանցում էր նկատվում նաև օն-լայն հանդիսատեսի շրջանում: Գերլարվածության պատճառով պարբերաբար դադարում էր Վալենսիայի կառավարության պաշտոնական կայքում (www.gva.es) հեռարձակվող հանդիպման հեռարձակումը:-0-