Երևանում մեկնարկեց պատանիների բասկետբոլի Հայաստանի առաջնությունը
ԵՐԵՎԱՆ, 25 հոկտեմբերի./Նովոստի-Արմենիա/. Հինգշաբթի Երևանում մեկնարկեց Հայաստանի 13-14 տարեկան պատանիների և աղջիկների բասկետբոլի առաջնությունը։
Ինչպես «Նովոստի-Արմենիային» տեղեկացրեցին Հայաստանի բասկետբոլի ֆեդերացիայից, առաջնությանը մասնակցում են տղաների և աղջիկների ութական թիմեր։
«Արարատ, Արթիկ, Էջմիածին, Գյումրի և Մասիս քաղաքները ներկայացրել են մեկական թիմ, ևս երեք թիմեր ներկայացրել են մայրաքաղաքի Աջափնյակ, Շենգավիթ և Արաբկիր համայնքները»,- նշեցին Ֆեդերացիայից։
Մամուլի ծառայությունից ընդգծեցին, որ Հայաստանի բասկետբոլի ֆեդերացիան մեծ նշանակություն է տալիս նման առաջնությունների անցկացմանը, քանի որ նրանց մասնակիցները մտնելու են Հայաստանի պատանիների հավաքականի մեջ։
Պատանիների բասկետբոլի Հայաստանի առաջնությունը տեղի կունենա երկու շրջանով և կավարտվի 2008 թվականին։ --0—
