ԵՐԵՎԱՆ, 10 մարտի. /Նովոստի–Արմենիա/. Հայաստանի նախագահ Սերժ Սարգսյանն իր ռուս գործընկեր Վլադիմիր Պուտինի հետ Մոսկվայում մեկնարկած հանդիպմանը հայտնել է, որ Ռուսաստանը և Հայաստանը բացարձակ փոխըմբռնում ունեն և՛ քաղաքական, և՛ տնտեսական, և՛ ռազմատեխնիկական, և՛ հումանիտար ոլորտներում, և այդ հարաբերությունները հաջողությամբ զարգանում են, հայտնում է Կրեմլի պաշտոնական կայքը։
Նախագահ Սարգսյանը շնորհակալություն է հայտնել Պուտինին աշխատանքային հանդիպման համար` համաձայնելով իր գործընկերոջ հետ, որ երկկողմ հարաբերությունները շատ լավ են զարգանում։ «Առհասարակ, բարի ավանդույթ է դարձել` հանդիպել տարեսկզբին նախորդ տարվա արդյունքներն ամփոփելու և ընթացիկ տարվա անելիքներն ուրվագծելու համար»,– ասել է նա։
Նա շնորհակալություն է հայտնել նաև Պուտինի հետ համատեղ նախորդ հանդիպումների ընթացքում երկկողմ պայմանավորվածությունների իրագործման համար։
Երկրի ղեկավարն իր խոսքում նշել է, որ որպես ՀԱՊԿ–ի նախագահող երկիր` Հայաստանը մեծ ուշադրություն է դարձնում այն որոշումների իրագործմանը, որոնք ընդունվել են ՀԱՊԿ սեպտեմբերի և դեկտեմբերի նստաշրջաններում։
Նախագահն ընդգծել է, որ Հայաստանին մտահոգում է ՀԱՊԿ–ի պատասխանատվության գոտուն հարակից տարածաշրջանների իրավիճակը` վերահաստատելով որ Հայաստանը ամբողջովին սատարում է Ռուսաստանի դիրքորոշմանը սիրիական հարցում։ Այս համատեքստում նա նշել է նաև, որ ողջունում է այն պայմանավորվածությունը, որին հասել է Ռուսաստանը Միացյալ Նահանգների հետ մարտական գործողությունների դադարեցման վերաբերյալ` համարելով այդ քայլը հարցի քաղաքական լուծման սկիզբ։
«Այսօր, պարոն Պուտին, մեկնարկում է շախմատի աշխարհի չեմպիոնի կոչման հավակնորդների մրցաշարը, և քանի որ Հայաստանի շախմատի ֆեդերացիան այդ մրցաշարի հովանավորն է, բացումը մենք նվիրել ենք Հայաստանի անկախության 25–ամյակին։ Այսօր Ռուսաստանի պատմական թանգարանում բացվում է նաև քաղաքակրթության մեծ ցուցահանդեսը, և ես վստահ եմ, որ այն դուր կգա Ռուսաստանի քաղաքացիներին և իր ավանդը կունենա մեր ժողովուրդների միջև եղբայրության ամրապնդմանը»,– ասել է Սերժ Սարգսյանը։
Նախագահը շնորհակալություն է հայտնել նախագահ Պուտինին այն ջանքերի համար, որոնք ձեռնարկում է Ռուսաստանը Լեռնային Ղարաբաղի հակամարտության կարգավորման ուղղությամբ, ավելացնելով, որ հայ ժողովուրդը հավատարիմ է մնում այդ հակամարտության խաղաղ կարգավորմանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
