Ֆրանսիայի Սենատի կողմից Հայոց ցեղասպանության ժխտման համար քրեական պատասխանատվություն նախատեսող օրինագծի ընդունումը վկայում է հայկական իշխանությունների վարած ճիշտ արտաքին քաղաքականության մասին, կարծում է ՀՀ ԱԺ փոխխոսնակ Էդուարդ Շարմազանովը:
«Նման օրինագծի ընդունումը ցույց տվեց, որ Հայաստանի իշխանությունները՝ նախագահ Սերժ Սարգսյանի գլխավորությամբ, այս տարիների ընթացքում ճկում, ճիշտ և հայամետ արտաքին քաղաքականություն են վարել», - երեքշաբթի լրագրողներին ասաց Շարմազանովը:
Նա նշեց, որ ֆրանսիացի սենատորների որոշումը ցույց տվեց, որ անիրատեսական են որոշ քաղաքական ուժերի պնդումներն այն մասին, թե 2009թ.-ին սկսված հայ-թուրքական հարաբերությունների կարգավորման գործընթացը կարող է խոչընդոտել ցեղասպանության միջազգային ճանաչմանը:
«Մենք տեսանք, որ վերջին ժամանակաշրջանում Ցեղասպանության միջազգային ճանաչման համար արվեց ավելի շատ բան, քան նախկինում», - ասաց փոխխոսնակը՝ ավելացնելով, որ այս գործընթացին աջակցելու վճռականության մասին նախագահը խոսել է բոլոր միջազգային ամբիոններից:
Նա ընդգծեց, որ Սենատի որոշումը կարևոր է ոչ միայն հայ-ֆրանսիական հարաբերությունների, այլև ցեղասպանության միջազգային դատապարտման համար: «Այս իմաստով կարծում եմ, որ Ֆրանսիան ցույց տվեց, որ հետամուտ է համամարդկային արժեքներին, մարդու իրավունքների պաշտպանությանը, ինչն օրինակ է ծառայում մյուս առաջատար երկրների համար, որոնք պետք է հասկանան, որ Ցեղասպանության ժխտումը ևս հանցանք է», - ասաց Շարմազանովը:
«Բոլոր քաղաքական ուժերի, հասարակության, սփյուռքի միասնական պայքարը պետք է շարունակվի մինչև Թուրքիան չճանաչի Ցեղասպանությունը», - ավելացրեց նա:
Ֆրանսիայի Սենատը նախօրեին ընդունել է ցեղասպանությունների, այդ թվում նաև Օսմանյան կայսրությունում տեղի ունեցած Հայոց ցեղասպանության ժխտման համար քրեական պատիժ նախատեսող օրինագիծը:
Ֆրանսիայի Ազգային ժողովը 2011 թ.-ի դեկտեմբերի 22-ին ընդունեց 1915 թ.-ին Օսմանյան կայսրությունում տեղի ունեցած Հայոց ցեղասպանության ժխտման համար քրեական պատիժ նախատեսող օրինագիծը: Օրինագիծը նախատեսում է մեկ տարվա ազատազրկում կամ 45 հազար եվրո տուգանք Օսմանյան կայսրությունում Հայոց ցեղասպանության ժխտման համար, որի ժամանակ սպանվել է շուրջ 1,5 մլն հայ:
Օրինագծի պետք է ստորագրվի Ֆրանսիայի նախագահի կողմից:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ։ Առաջինը 1965 թ.-ին ճանաչել է Ուրուգվայը, որի օրինակին են հետևել Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ-ի 42 նահանգները։ Հայոց ցեղասպանությունը ճանաչել են նաև Վատիկանը, Եվրախորհրդարանը, Եկեղեցիների համաշխարհային խորհուրդը։-0-
