Թուրքիայի առաջին տիկինը հատուկ ուտեստներ է պատրաստել Հայաստանի նախագահ Սերժ Սարգսյանի համար, հաղորդում է «Նովոստի-Արմենիա» գործակալության թղթակիցը Թուրքիայից:
Ինչպես Թուրքիա-Հայաստան ֆուտբոլային հանդիպումից հետո հայ լրագրողներին տեղեկացրեց ՀՀ ԱԳ նախարար Էդվարդ Նալբանդյանը, ՀՀ նախագահի պատվին ընթրիք է մատուցվել Գյուլի կողմից:
«Այս կապակցությամբ Անկարայից բերվել են հատուկ ուտեստներ, որոնք պատրաստել է Թուրքիայի նախագահի կինը: Նման կերպ Գյուլը ցանկացել է հատուկ ջերմություն հաղորդել Հայաստանի նախագահի ընդունելությանը», - ասաց Նալբանդյանը
ՀՀ նախագահ Սերժ Սարգսյանն այցելել է Թուրքիա՝ 2010 թ. աշխարհի առաջնության ընտրական փուլի շրջանակներում Թուրքիա-Հայաստան հանդիպումը համատեղ դիտելու նպատակով:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ -0-
