Հայ-թուրքական սահմանը չի բացվի մինչև Ղարաբաղյան հակամարտության կարգավորումը. Էրդողան

Թուրքիայի վարչապետ Ռեջեփ Թայիփ Էրդողանը Ադրբեջանի նախագահ Իլհամ Ալիևի հետ համատեղ մամուլի ասուլիսի ժամանակ բացասաբար է պատասխանել այն հարցին, թե կբացվի՞ արդյոք հայ-թուրքական սահմանը առանց Ղարաբաղյան հակամարտության կարգավորման։

«Հայաստանի հետ մեր սահմանները փակվել են Լեռնային Ղարաբաղի օկուպացումից հետո։ Եվ այժմ, քանի օկուպացումը հանված չէ, մենք սահմանները չենք բացի։ Ո՞վ է դա ասում։ Դա ասում է Թուրքիայի վարչապետը։ Նման երաշխիք նրանից բացի կարո՞ղ է ուրիշ մեկը տալ»,- ասել է Էրդողանը, հաղորդում է ՌԻԱ Նովոստին։

Իր հերթին, Ալիևը շնորհակալություն է հայտնել Էրդողանին նրա պատասխանի համար։ «Ավելի պարզ ու բացահայտ պատասխան չի կարող լինել»,- ասել է նա։ «Ուզում եմ նշել նաև այն, որ ոչ ոքի համար գաղտնիք չէ, որ վերջին ամիսներին ադրբեջանական հասարակությունում որոշակի առումով անհանգստություն կար։ Եվ հավանաբար, այդ զգացմունքների համար որոշակի բնական պատճառներ կային։ Սակայն, ամենակարևորն այն է, որ ես սա ուզում եմ ասել, դիմելով ադրբեջանական ժողովրդին, որևէ կասկածի, այլ մտքի կամ շահարկման տեղ չի մնում (հայ-թորքական սահմանի բացման առնչությամբ)»,- ավելացրել է Ալիևը։  

Ալիևի խոսքերով, «թուրքական պետության ղեկավարը, Թուրքիայի վարչապետը բազմիցս պարզություն են մտցրել այդ հարցում»։ «Եվ այսօր հարգարժան պարոն վարչապետի խոսքերը շատ գեղեցիկ պատասխան էին (հայ-թուրքական սահմանի հնարավոր բացման հետ կապված հարցի վերաբերյալ),- ամփոփել է Ալիևը։ -0-