Ադրբեջանցի պաշտոնյաները ԵԱՀԿ ՄԽ համանախագահների դիրքորոշումը հայամետ են համարում
Բարձրաստիճան ադրբեջանցի պաշտոնյաները նախատում են ղարաբաղյան հակամարտության կարգավորման ԵԱՀԿ Մինսկի խմբի (ՄԽ) համանագախահներին ղարաբաղյան հակամարտության կարգավորման բանակցային գործընթացում իրական իրավիճակը թաքցնելու և Հայաստանի դիրքորոշմանն աջակցելու համար։
«Ես չեմ կարող կանխատեսել ապագա քայլերը, սակայն ինձ զարմացնում է այն, թե ինչու՞ ԵԱՀԿ ՄԽ համանախագահները չեն խոսում իրական իրավիճակի մասին», - ասել է Ադրբեջանի նախագահի գործադիր աշխատակազմի արտաքին կապերի բաժնի ղեկավար Նովրուզ Մամեդովը «Սվոբոդա» ադրբեջանական ռադիոյի խմբագրությանը տված հարցազրույցի ժամանակ, հաղորդում է «ՌԻԱ Նովոստին»՝ հղում անելով տեղական ԶԼՄ-ներին։
Նրա խոսքերով, Պրահայում մայիսի 7-ին տեղի ունեցած Ադրբեջանի և Հայաստանի նախագահներ Իլհամ Ալիևի և Սերժ Սարգսյանի վերջին հանդիպման ժամանակ հայկական կողմը «իրեն չափազանց ոչ կառուցողական դրսևորեց», «այսինքն նա չցանկացավ որևէ քայլ ձեռնարկել հակամարտութան կարգավորման ուղղությամբ և ևս մեկ անգամ տարածքային պահանջներ ներկայացրեց Ադրբեջանի նկատմամբ»։
Մամեդովը ընդծգեց, որ «չնայած դրան, առանց փոխադարձ համաձայնության, չքննարկելով Ադրբեջանի նախագահի հետ՝ համանախագահները հանդես եկան մի հայտարարությամբ, որում աջակցեցին ՀՀ նախագահի դիրքորոշմանը և, ինչպես երևում է, սեփական տեսակետին»։
Նրա խոսքերով, համանախագահները «սխալ են տեղեկություն են հաղորդում համաշխարհային հանրությանը, ԱՄՆ նախագահին և պետքարտուղարին՝ խոսելով բանակցային գործընթացում տեղ գտած առաջընթացի, կողմերի դիրքորոշումների մերձեցման և այլնի մասին»։
«Այս ամենը ևս մեկ անգամ վկայում է ագրեսոր-երկրի՝ Հայաստանի նկատմամբ շարունակվող կողմնակալության և նրա շահերի պաշտպանության մասին։ Մյուս կողմից համանախագահները շահագրգռված են գործընթացի ձգձգմամբ, գործուղումների և իրենց պարտականությունների շարունակությամբ», - ասել է Ադրբեջանի նախագահի աշխատակազմի բարձրաստիճան պաշտոնյան։
ՄԽ համանախագահները Ալիևի և Սարգսյանի միջև Պրահայում տեղի ունեցած հանդիպումից հետո հանդես էին եկել համատեղ հայտարարությամբ, որում մասնավորապես ասվում էր, որ նրանք կարծում են, որ Հայաստանի և Ադրբեջանի յուրաքանչյուր հանդիպում մոտեցնում է կողմերին հակամարտության կարգավորման առաջխաղացմանը։ Բացի այդ, փաստաթղթում ասվում է, որ Պրահայի հանդիպումը ցույց է տալիս, որ ձեռք է բերվել լուրջ առաջընթաց, ինչպես նաև այն, որ «նախագահները հավանության են արժանացնում մաքոքային դիվանագիտության ամրապնդման վերաբերյալ համանախագահների ծրագիրը, որը կապված է առաջընթացի համար կարևոր տարրեր հավաքելու հետ»։-0-
