ԵՐԵՎԱՆ, 18 հունվարի. /Նովոստի-Արմենիա/. ՀՀ սփյուռքի նախարարության նախաձեռնությամբ 2011 թ.-ին Հայաստանի և Սփյուռքի միավորմանն ուղղված ավելի քան տասը տարատեսակ միջոցառումներ են անցկացվել, չորեքշաբթի տարեկան ամփոփիչ մամուլի ասուլիսի ժամանակ հայտարարել է գերատեսչության ղեկավար Հրանուշ Հակոբյանը:
«Նախորդ տարի նախարարությունը կազմակերպել է 12 համաժողով, խորհրդակցություն, կլոր սեղան և փառատոն, որոնք նվիրված էին տարատեսակ թեմաների՝ Սփյուռքի ներուժը համախմբելու և Հայաստան-Սփյուռք համագործակցությունն ամրապնդելու նպատակով», - ասել է նախարարը:
Նրա խոսքերով՝ 2011 թվականը նախարարության կողմից հռչակվել էր Երիտասարդության տարի, ինչի կապակցությամբ գերատեչությունը բացել է Երիտասարդ լրագրողների դպրոց, Սփյուռքի երիտասարդ առաջնորդների ամառային դպրոց, ինչպես նաև ստեղծվել է Համահայկական երիտասարդական վիրտուալ խորհրդարան:
«Մենք իրականացրել ենք «Արի տուն» ծրագիրը, որի շրջանակներում աշխարհի 35 երկրի 812 երիտասարդ հայեր այցելել են իրենց պատմական հայրենիք, ինչպես նաև «Համայնքների աջակցություն» ծրագրի շրջանակներում Սփյուռքի ավելի քան 40 հայկական դպրոցներ ստացել են ուսումնական, գիտական և մանկական գրականության ավելի քան 50 հազար օրինակ», - ասել է նախարարը:
Նրա խոսքերով՝ նախարարության կարևոր ձեռքբերումն է նաև այն, որ այս պահին ավելի քան 30 հազար հայ ստացել է երկքաղաքացիություն, ընդ որում դրանց կեսը՝ 2011 թ.-ին:
«Հայաստանի անկախության 20-ամյակի կապակցությամբ նախարարությունը կազմակերպել է 46 երկրների հայկական համայնքների ղեկավարների և ներկայացուցիչների լայնամասշտաբ համաժողով, որի ընթացքում քննարկվել է Հայաստան-Ղարաբաղ-Սփյուռք եռամիասնության հարցը», - ավելացրել է Հակոբյանը:
Նա հավելել է, որ նախորդ տարի գործարկված բոլոր նախագծերը կշարունակվեն նաև 2012 թ.-ին: «Շուտով մենք նախատեսում ենք սփյուռքի երիտասարդ ներկայացուցիչների մասնակցությամբ մի շարք փառատոններ և համաժողովներ անցկացնել», - ավելացրել է Հակոբյանը:
Նախարարը նաև նշել է, որ 2011 թ.-ի դեկտեմբերին ՀՀ ֆինանսների նախարարությունը մոնիտորինգիի է ենթարկել գերատեսչության գործոնեության ողջ երեք տարվա ընթացքում իրականացրած ֆինանսական գործունեությունը, որի շրջանակներում որևէ ֆինանսական խախտում չի բացահայտվել:-0-
